Потпишувањето на договорот со „Бехтел и Енка“ е закажано за утре напладне и покрај тоа што медиуми и опозицијата изнесоа низа сомнежи поврзани со дел од компаниите избрани да бидат надзор на изградбата на автопатите од коридорите 8 и 10-д
Сомнежите кои изминатите денови ги отворија медиумите и опозицијата за дел од фирмите членки на конзорциумот што треба да биде надзор на изградбата на автопатите од коридорите 8 и 10-д, а кои ќе ги гради американско-турскиот конзорциум „Бехтел и Енка“, не ја поколебаа Владата и таа веќе за утре најави потпишување на договорот за изградба.
Во соопштението испратено од владината прес-служба се наведува дека утре, 8.3.2023 година (среда), во 12 часот, во Свечената сала на Владата на Република Северна Македонија ќе се одржи настан по повод потпишување на договор за Коридор 8 и 10-д помеѓу Министерството за транспорт и врски, Јавното претпријатие за државни патишта и конзорциумот „Бехтел и Енка“. На потпишувањето на договорот ќе бидат премиерот Димитар Ковачевски, првиот вицепремиер Артан Груби, министерот за транспорт и врски Благој Бочварски, директорот на Јавното претпријатие за државни патишта, Ејуп Рустеми, како и генералниот директор за нискоградба „Бехтел“, Марк Алисон.
Претходно на владина седница, на предлог на Комитетот за преговори за склучување на Договорот за градење на коридорите 8 и 10-д, беше одобрено склучувањето на договорот со избраниот стратешки партнер, конзорциумот „Бехтел и Енка“.
„Со тоа, ќе се овозможи почеток на изградбата на овие важни проекти и реализација на оваа многугодишна стратешка определба за инфраструктурно поврзување на Република Северна Македонија со регионот, што ќе придонесе и во економскиот развој на државата“,
информираат од владината прес-служба.
Одобрувањето за склучување на договорот денеска го објави и првиот вицепремиер Артан Груби. Зеленото светло за договорот доаѓа по предлог на Комитетот за преговори за изградба на овие автопатишта, со кој раководи токму Груби, а по завршени четиринеделни преговори меѓу консултантот за финансиски трансакции на Владата, „ИРД инженеринг“ и „Бехтел и Енка“.
Коридорот 8 е долг 68 километри и станува збор за автопатот од Тетово до Гостивар, потоа кон Кичево, преку Струга до Ќафасан, додека Коридорот 10-д е на делницата од Прилеп до Битола со должина од 40 километри и има шест ленти, а периодот на изградба е три години од почетокот на работите.
Токму договорите поврзани со надзорот на изградбата на овие автопатишта деновиве се една од најактуелните теми во јавноста.
Добитниците на тендерот за надзор на изградбата беа тема и на новинарско истражување на „Призма“. Надзорот треба да го врши конзорциумот „ИРД инженеринг“, а покрај ИРД, дел од него се уште три фирми.
Меѓу нив се шпанската „Ептиса“ и две домашни фирми – „Евро консалтинг“ и „Електра солушн“. Еден од сопствениците на „Евро консалтинг“ е македонскиот државјанин Бранислав Димитријевиќ кој во Ерменија работел за фирмата „Ептиса“. Сега, како што објави „Призма“, тој е под истрага на ерменското обвинителство за „развојот и спроведувањето на проектот патен коридор Север – југ во периодот од 2009 до 2018 година“.
Вчера, во реакција од „Ептиса“ насловена „Официјален демант“ генерално наведуваат дека ги осудуваат „невистинитите, неточните и навредливите информации“, без притоа конкретно да кажат што е невистинито во новинарското истражување и медиумските објави што следуваа потоа.
Утрово, пак, во нова реакција го демантираа ерменското обвинителство нагласувајќи дека Димитријевиќ никогаш не бил ангажиран или вработен во „Ептиса“ на ниту една позиција.
Минатата недела ТВ Алсат објави дека Владата пред околу три години донела одлука со која на сите државни институции и општини им забранила да ја ангажираат компанијата „Ептиса“ на тендери вредни над 1 милион евра. Одлуката е донесена на седница на Владата одржана на 24 ноември 2020 година, а десет недели подоцна, односно на 9 февруари 2021 година, Министерството за финансии било известено дека Владата донела одлука за укинување на одлуката одобрена на 24 ноември 2020 година, а институциите заедно со општините сега можат да доделуваат тендери со вредност над 1 милиони евра на фирмата на обвинетиот од ерменските власти – „Ептиса“.
ПОВРЗАНИ ВЕСТИ: