Од „Призма“ бараат од шпанската фирма да наведе што конкретно е неточно во новинарското истражување или во спротивно, како што велат, ќе сметаат дека „Официјалниот демант“ е суптилна закана кон истражувачкиот тим новинари
Од редакцијата на порталот „Призма“ на Балканската истражувачка репортерска мрежа (БИРН) велат дека се подготвени да ги исправат информациите за шпанската фирма „Ептиса“, дел од конзорциумот што го доби тендерот за надзор на изградбата на коридорите 8 и 10-Д, но прво од компанијата да кажат што конкретно е неточно.
„Балканска истражувачка репортерска мрежа, како реномирана регионална новинарска групација со меѓународна репутација, во согласност со највисоките професионални и етички стандарди, е подготвена веднаш да ги исправи/демантира информациите објавени во текстот ‘Од скандал во Ерменија до надзор на Бехтел и Енка во Македонија’ доколку се тие неточни. Во таа смисла, најљубезно Ве молиме да ни доставите конкретни информации што точно демантирате и сметате дека е погрешно наведено во посочениот текст“,
велат од „Призма“.
Во спротивно, нагласуваат, ќе сметаме дека Вашиот официјален демант – за итно објавување е суптилна закана кон БИРН и нејзиниот истражувачки тим, за што ќе бидеме принудени да ги информираме сите домашни и странски адреси задолжени за следењето на слободата на медиумите.
„Убедени дека тоа не е случај и дека навистина ни се протнала некоја фактичка грешка во врска со вашата компанија (која во текстот се споменува во цитатот од Јавното обвинителство на Ерменија и како дел од конзорциумот предводен од ‘ИРД’), Ве уверуваме дека таа ќе биде веднаш исправена. Истовремено, Ве информираме дека БИРН ќе продолжи да истражува со еднаков ентузијазам и професионалност и дека сите свои наоди во секое време е подготвена да ги брани и пред својата публика и пред правосудните органи, доколку е потребно“,
велат од „Призма“.
Шпанска „Ептиса“ претходно испрати реакција насловена „Официјален демант“ во врска со истражувањето кое го објави „Призма“. Меѓутоа, во реакцијата, компанија само генерално наведува дека ги осудува „невистинитите, неточните и навредливите информации“, без притоа конкретно да каже што е невистинито во новинарското истражување и медиумските објави што следуваа потоа.
„Ептиса“ е дел од конзорциумот од вкупно четири компании кои го добија тендерот за надзор на автопатиштата. Покрај неа и водечката компанија „ИРД“, останатите две се домашни фирми: „Евро консалтинг“ и „Електра солушн“.
Како што пишуваше „Призма“, со две од овие фирми е поврзан македонскиот државјанин Бранислав Димитријевиќ кој е под истрага во Ерменија за „развојот и спроведувањето на проектот патен коридор Север – југ во периодот од 2009 до 2018 година“. Едната од фирмите е „Евро консалтинг“ каде што Димитријевиќ е еден од сопствениците, а другата е „Ептиса“ за која тој работел токму во Ерменија.
ПОВРЗАНИ ВЕСТИ:
„Призма“: Од скандал во Ерменија до надзор на „Бехтел и Енка“ во Македонија
Изборот на надзорот за коридорите 8 и 10 беше транспарентен, велат од ЈП за државни патишта