РЕЗИМЕ
„360 степени“ е организација посветена на заложбата јавноста да добие навремени, точни и кредибилни информации. Применувајќи високи стандарди во новинарската работа, се обидуваме граѓаните да ја видат целата слика, целиот круг, сите 360 степени и да го обликуваат своето мислење, без оглед на партиските структури, врз основа на фактите што ги презентираме. Така, ние ја исполнуваме мисијата на медиумите да бидат „кучиња чувари“ на демократијата, да придонесат така што Владата и институциите ќе бидат поодговорни, а граѓаните ќе учествуваат во креирање политики и ќе носат информирани одлуки.
Нашата амбиција е „360 степени“ да направи промена во светот на информациите, да промовираме стандарди во телевизиското и онлајн-новинарството во Северна Македонија и да продреме длабоко во темите и прашањата од јавен интерес.
„360 степени“ е член на Советот за етика во медиумите во Северна Македонија (дел од Алијансата на независни совети за печат на Европа – AIPCE) и се придржува до неговиот етички кодекс.
ВРЕДНОСТИ
Работата на „360 степени“ ДОО, како издавач на ТВ и онлајн-содржина, се раководи според пет основни вредности.
Доверливост
Не можеме секогаш да ја гарантираме „вистината“, но ригорозното проверување на фактите е основниот принцип на нашето новинарско работење. Во случаи кога не ќе можеме да ги потврдиме информациите, тоа секогаш ќе го кажеме.
Професионализам
Новинарството има капацитет да служи како „куче чувар“ над оние чија моќ и позиција најмногу влијаат врз граѓаните. Но, само професионален новинар, кој гледа на секој агол и извор во добро заокружени и непристрасни приказни, може да ја исполни таа улога.
Разновидност
Нашето новинарство покрива приказни за најширокиот спектар граѓани, без оглед на нивните пол, раса, етничка припадност, религија, сексуална, политичка или друга ориентација. Овој принцип се применува во нашата редакција.
Иновации
Новинарството создава мапи според кои граѓаните се движат низ општеството. Нашата цел е да ви ги претставиме насоките на вашиот ТВ, мобилен телефон, компјутер, што е можно поразбирливо.
Одговорност
Еден знак на одговорно новинарство е можноста тоа да се смета за одговорно. Кога правиме грешки, ги коригираме.
ПРОФЕСИОНАЛНА ПРАКТИКА
Анонимни извори/цитати
Како општо правило, „360 степени“ претпочита да не објавува информации што им се припишуваат на анонимни извори. Бидејќи доверливиот разговор со изворите секогаш ќе биде суштински дел од известувањето, изворите ќе добијат анонимност само поради специфични и клучни причини. Постојат моменти кога анонимните извори се неизбежни, особено за да се спречи одреден поединец да биде ставен во ризик или да ја изгуби работата ако биде идентификуван.
Во сите случаи, изворот треба да им биде познат на авторот, уредникот на сторијата и правниот советник, ако е тоа потребно, и исто така условите со кои авторот им дал анонимност на своите извори.
Непотпишани текстови
Написите објавени од „360 степени“ ДОО треба да бидат објавени непотпишани ако претставуваат соопштение, јавна изјава, дел преземен од новинска агенција или, во исклучителни околности, кога безбедноста на авторот може да биде загрозена. Сета друга оригинална содржина се објавува со името и презимето на авторот.
Заслуги
Тимот на „360 степени“ ДОО не смее да репродуцира други содржини без да наведе од каде се преземени. Во објавениот материјал треба да биде нотирано дека потекнува од друга медиумска куќа, како и директната врска (кога е достапна) до оригиналниот напис што се презема.
Исплати
Вработените во „360 степени“ не смеат да прифаќаат пари за креирање стории што, бездруго, треба да се објавуваат како редовна информативна содржина. Платената содржина е дозволена само на веб-страницата и е јасно категоризирана како „комерцијален текст“.
„360 степени“ не плаќа за извори/стории, освен за хонорарни автори или за „стрингери“ откако тоа ќе го одобри главниот уредник.
Цитати
Цитатите не треба да се менуваат со што би се променил нивниот контекст или значење.
Директна поддршка
Новинарите не треба да се согласат да ги промовираат финансиските интереси на потенцијалните соговорници или соработници, или нивните спонзори, како начин за обезбедување пристап до нив.
Грешки
Политика на „360 степени“ е да се поправаат грешките што е можно побрзо.
Правичност
Новинарите и уредниците на „360 степени“ ДОО мора да дадат сè од себе за да ѝ отстапат време и простор на личноста која е цел на сериозни критики или обвинувања, во случај кога тие тврдења ќе бидат објавени од „360 степени“.
Вокабулар
„360 степени“ користи вокабулар што нема да навредува. Псовки ќе се користат само во случаи кога тие се од суштинско значење за прикажување настан или поединец во сторија.
Извори
Изворите на кои им е ветена доверливост мора да бидат заштитени по секоја цена. Сепак, кога е можно, изворите на информации треба поконкретно да се идентификуваат.
Верификација
Сите клучни факти во приказната (сторијата) што можат да се проверат треба да имаат „доказ“ (текст, фотографија, линк или видео) прикачен со нив. Фактите што не можат независно да се проверат, а се објавени од други кредибилни организации, треба повторно да се објават, но не и без образложение до читателите дека тие факти не можат да бидат независно проверени од „360 степени“.
ОДНЕСУВАЊЕ И СУДИР НА ИНТЕРЕСИ
Создавање работна средина во која секој може слободно да се изрази подразбира дека новинарите имаат убедувања и верувања надвор од работното место. Уредувачките насоки на „360 степени“ ДОО не се алатка за мешање во приватниот живот на вработените, туку се заштитна мерка за надворешни интереси да не се судрат со функционирањето на редакцијата, со што ќе се компромитираат нејзиниот интегритет и кредибилитет.
Доверливост
Персоналот што има пристап до лични информации за другите вработени во „360 степени“ треба тие информации да ги третира како доверливи. Откривањето на овие информации надвор од компанијата може да доведе до отказ.
Конфликт на интереси
Новинарите и другите членови на редакцијата што имаат активности надвор работното место треба да ги пријават во ситуација кога ќе им се даде задача да известуваат за активност во која приватно се вклучени. За тоа треба да го информираат главниот уредник.
Новинарот не треба да пишува или цитира роднина или партнер, дури и ако роднината или партнерот се експерти за конкретна област. Ако, од која било причина, се направи исклучок од ова правило, врската треба да биде јасна.
Подароци:
– На вработените не им е дозволено да ја користат својата позиција за да се здобијат со приватни бенефиции;
– Платените патувања од други организации се прифаќаат само ако „360 степени“ може слободно да одреди репортер и слободно да избере како репортерот ќе известува во приказната што произлегла од патувањето;
– Не се охрабрува придружба на партнер на службено патување. Ако тоа се случи, дополнителните трошоци треба да ги плати новинарот или лицето(та) што го придружува новинарот;
– Новинарите и другите членови на редакцијата треба да поднесат извештај до главниот уредник ако некое лице или организација им понуди подарок.
Социјални медиуми
„360 степени“ го почитува правото на приватност на своите вработени. Сепак, организацијата очекува вработените да ги почитуваат Вредностите, особено кога комуницираат на социјалните медиуми. Прекршувањето на тие Вредности (на пример, говор на омраза) може да резултира со формални последици. „360 степени“ ДОО силно ги советува своите вработени да следат и да известуваат за вестите и самите да не станат вест.
Јавни настапи
Генерално, „360 степени“ не бара пријавување на активностите на вработените, кои вклучуваат јавни настапи, ако притоа вработените немаат конфликт на интереси што треба да биде пријавен.
Единствените исклучоци од принципот се:
– кога вработениот треба да се појави пред суд;
– кога вработениот е поканет да претседава со јавни форуми/семинари или да го изрази своето професионално мислење за други медиумски организации.
Можноста за такви активности треба да му биде соопштена на главниот уредник.