Поранешниот генерален секретар на Владата Драги Рашковски е осуден на затворска казна од осум години, а за виновни се прогласени и преостанатите шест обвинети чии затворски казни се движат од три до пет и пол години затвор
Судечкиот совет на чело со судијката Фанка Јанчулева-Михаиловска во Основниот кривичен суд Скопје денеска ја изрече пресуда за случајот „Софтвери“ во кој првообвинет за злоупотреба на службената положба и овластување, перење пари и фалсификување исправа е поранешниот генерален секретар на Владата Драги Рашковски. Со него, обвинети беа уште шест лица.
Пресудата што беше изречена за сите обвинети е:
- Драги Рашковски – осум години затвор
- Ивица Димитровски – пет години затвор
- Игор Христов – пет години и шест месеци
- Даниел Станчев – четири години затвор
- Ирена Ивановска – три години и шест месеци
- Игор Ивановски – три години
- Маја Силјановска – три години
Рашковски затворската казна ја доби за делата злоупотреба на службената положба и овластување – седум годни и за перење пари – една година и шест месеци, кои судот во единствена казна ги пресмета на осум години. За делото фалсификување исправа, пак, беше ослободен од обвинение.
Другите обвинети неправосилно се осудени за делото злоупотреба на службената положба и овластувања.
Покрај затворската казна, првостепената пресуда предвидува и солидарно да се надомести штетата на државата во висина од 6,4 милиони денари за набавката на софтверот за биометриска идентификација и речиси пет милиони денари за софтверот за определување просечна брзина на возилата. Судот одлучи и да се надоместат парите од исплатените хонорари на обвинетите од Генералниот секретаријат на Владата. Вкупната штета, како што процени судот, е 18 794 136 денари (околу 305 000 евра).
Пресудата не е правосилна и странките имаат право на жалба до Апелацискиот суд Скопје.
Случајот „Софтвери“ се однесува на тендери од Генералниот секретаријат на Владата во времето на Рашковски и опфаќа четири набавки на: систем за биометриска идентификација; софтвер за определување на просечна брзина на возила во сообраќајот и изрекување на казни; ANPR-камери за препознавање регистарски таблички за возила; и на метални кабини за потребите на системот на биометриска идентификација и систем за автоматско препознавање на регистарски таблички.
Покрај тендерите, дел од обвинението за предметот е и исплата на хонорари.
Во пресрет на денешното изрекување на пресудата Основното јавно обвинителство за гонење организиран криминал и корупција (ОЈО ГОКК) побара затворска казна за Рашковски и забрана да биде универзитетски професор, како и останатите обвинети да бидат соодветно казнети.
„Сите четири предметни постапки за јавни набавки за кои одлуките ги носел првообвинетиот се незаконски спроведени и доколку не се водеше оваа постапка, софтверот, системот, кабините и камерите ќе останеа засекогаш заборавени, а парите на граѓаните сепак потрошени“,
рекоа од Обвинителството.
Рашковски и останатите обвинети, пак, во завршните зборови рече дека очекува ослободителна пресуда бидејќи смета дека Обвинителството не успеало да докаже ниту една од своите теории.
„Во целиот овој процес одбраната беше таа што напаѓаше, а Обвинителството на таквите напади немаше никаков одговор: Девизата на одбраната е – нападот е најдобра одбрана. Незнаењето плус моќ е еднакво на тиранија“,
наведе поранешниот генсек во завршните зборови, кој како и во текот на целиот судски процес, тврдеше дека системот за сообраќајни прекршоци е имплементиран и функционален.
Денешната пресуда доаѓа откако пред нешто повеќе од две години, „360 степени“ го отвори во јавноста. Во март 2021 година ја објавивме првата сторија дека Генералниот секретаријат на Владата купил софтвер за сообраќајни прекршоци вреден 81 000 евра, иако ниедна институција ниту го барала, ниту го користи, како и дека пред да го купи, како генерален секретар на Владата, тој лично регистрирал таков патент.
- (ВИДЕО) Рашковски купил софтвер за сообраќајни казни, а МВР не знае за набавката и не планира да ја користи
- (ВИДЕО) 360° во потрага по „Инвока гроуп“ – одете си, ќе викнам полиција!
- (ВИДЕО) Рашковски вози луксузен џип кој не фигурира во неговиот анкетен лист
- Рашковски купил и „систем за биометриска идентификација“ со државни пари во 2019, а сличен изум патентирал во 2013 година
Институцијата надлежна да казнува за сообраќајни прекршоци – МВР, а не Владата, тогаш одговори дека ниту барало ниту планира да го користат софтверот за кој никој не ги прашал.
По 10 дена од првата сторија, на 18 март 2021 г., Обвинителството за гонење организиран криминал и корупција отвори предистрага, а потоа, на 21 април 2021, случајот напредуваше во истрага. Во истрагата беа споени и другите набавки поврзани со софтверот за биометриска идентификација, како и исплата на хонорари од Генералниот секретаријат. Потоа, на 8 октомври 2021 година беше поднесено обвинение против Рашковски и шест други лица, а Кривичен во целост во прифати обвинението на 29 декември 2021, по што следуваше судскиот процес кој денеска заврши пред првостепениот суд.
Додека Рашковски и во судница и во медиумите обвинуваше за хајка и нестручно работење на обвинителството, поранешната шефица на ОЈО ГОКК Вилма Русковска, пак, неколку пати јавно изрази сомнежи дека тоа што решила да го гони генсекот на Влада е една од главните причини поради кои беше суспендирана и тргната од обвинителството со кое раководеше.
Повеќе вести од судскиот процес „Софтвери“:
- Почна процесот против Рашковски: Русковска вели дека ќе докаже дека тој ја злоупотребувал функцијата за лични материјални цели
- Рашковски во судница: Ајде да направиме реконструкција да видиме дали софтверот навистина не функционира
- Судење „Софтвери“: Во вибер-комуникацијата Рашковски бил „Перо 078“, обвинителката чита пораки за тендерите
- Рашковски за пораките од Вибер: Никој не ме нарекува Перо
- Рашковски се брани во „Софтвери“: Негира дека го купил сопствениот патент и вели дека и Илон Маск би напишал иста спецификација како него за тендерот
Други поврзани вести:
- Русковска смета дека три предмети ѝ „пресудиле“ за суспензијата
- Случаите што ги отвори „360 степени”, а потоа ОЈО ГОКК ги истражуваше – за Рашковски и „Виа комерц”, ѝ пресудиле на Русковска?
- Рашковски бара извинување од Русковска: Кажете со име и презиме кој ви ја даде понудата во замена за запирање на „Софтвери“
- Стразбур предлага, Рашковски и Станчев одбиваат да се спогодат со државата за притворот во „Софтвери“