Во разговорот во поткастот на ИРЛ, обвинителката сведочеше и за тоа како течат притисоците во Обвинителството, па на констатацијата од новинарите дека во новинарството тоа оди преку јавување од уредникот или газдата, Русковска одговори дека и кај обвинителите тоа оди така отприлика
Поранешната шефица на Основното јавно обвинителство за гонење организиран криминал и корупција (ОЈО ГОКК) смета дека за таа да биде суспендирана од работа влијаеле три предмети. Станува збор за предмети за кои е познато дека се поврзани со актуелни функционери од оваа и претходната власт.
Во синоќешното гостување во поткастот на Истражувачката репортерска лабораторија (ИРЛ), на констатацијата дека од доаѓање на американскиот тим истражители во земјава сите очекуваме нешто да се смени бидејќи самите не можеме да се избориме и на прашањето дали и таа се „предала“ бидејќи смета дека не може нешто да промени, Русковска одговори:
„Јас не можам ништо да сменам кога сум под суспензија. И да не бидам под суспензија, имам решение да се вратам во ОЈО Скопје. Што можам да направам и да сменам? Кога почнав одредени предмети, веднаш ја добив суспензијата“.
На прашањето кои се тие предмети што ги работела и дали тие се причината за суспензијата, Русковска конкретно го наведе случајот поврзан со Управата за финансиска полиција каде што Обвинителството во текот на летото изврши претрес, како и предметот со станицата за технички преглед „Виа комерц“ каде што „зелено светло“ добил автобусот на „Беса транс“ кој изгоре во Бугарија и загинаа 45 лица.
„Тие два предмети ве суспендираа?“, праша уште еднаш новинарот на ИРЛ, по што Русковска додаде:
„Да. Мислам дека и претходниот, големо влијание имаше и предметот за Рашковски“.
Во разговорот во поткастот на ИРЛ, обвинителката не негираше дека постојат притисоци, туку индиректно посочи оти тие стигале од хиерархиски повисоките структури во обвинителскиот систем.
ИРЛ: Имате кажано дека сте биле под одреден политички притисок од една поранешна влада. Како изгледа притисокот? На пример, кај нас новинарите ќе се јави уредникот/газдата и ќе рече …
Русковска: Епа и кај нас обвинителите оди така отприлика.
ИРЛ: Како се случува тоа?
Русковска: Не можам да одговорам на ова прашање затоа што утре може да добијам тужба за клевета, ама исто како и кај вас.
ИРЛ: Се јавуваат кај некој газда, обвинител и ви викаат ставете во фиока? Тоа го имате доживеано?
Русковска: Мене ме суспендираа затоа што не прифаќав притисоци и влијанија.
Кои се трите случаи?
Предметот за работењето на Управата за финансиска полиција (УФП) во ОЈО ГОКК беше оформен по поднесена анонимна кривична пријава против повеќе лица од УФП поради што на 18 јули беше извршен и претрес од страна на Обвинителство. Со него се чини дека ескалираше антагонизмот помеѓу Русковска и тогашниот директор на Управата, Арафат Муареми. Муареми тогаш реагираше дека од Обвинителството во барањето за претрес до судот дале погрешни податоци дека има основи на сомнение дека е сторено кривично дело, а во списите од предметот, според неговите тврдења, немало ништо туку само анонимна кривична пријава без докази.
Беше извршен и надзор, по што од кабинетот на државниот обвинител Љубомир Јовески излегоа со соопштение дека констатирале пропусти во постапувањето при претресот, како и тоа што го коментираше Муареми, дека во барањето за претрес до судот е наведено дека има основи на сомнение за сторено кривично дело, а во списите од предметот има само анонимна кривична пријава.
По надзорот беше поведена и дисциплинска постапка за шефицата и две обвинителки од ОЈО ГОКК (Ивана Трајчева и Елизабета Јосифоска), а за Русковска дополнително беше одредена и суспензија, на која таа се жалеше, но Советот на јавни обвинители ја отфрли жалбата. Муареми, пак, за истиот случај поднесе и кривична пријава против обвинителките за што постапка се води во ОЈО Скопје.
За случајот со „Виа комерц“, пак, „360 степени“ пишуваше уште лани пред Нова година. Инспектори на МВР во август 2021 година предложиле привремено затворање на станицата за технички преглед поради серија констатирани недостатоци. Контролата била извршена на 12 август 2021, а предлогот-решение за забрана за работа од службите во МВР било изготвено на 25 август. Додека се чекал потписот од министерот Оливер Спасовски, автобусот на „Беса транс“ на 5 октомври лани бил на технички преглед. На 23 ноември лани се случи автобуската несреќа во Бугарија, а три дена по неа, на 26 октомври, Спасовски го потпишал решението.
Третиот предмет, кој според Русковска влијаел таа да биде суспендирана е против поранешниот генерален секретар на Владата Драги Рашковски, познат во јавноста како „Софтвери“. Случајот го отвори „360 степени“ кога во март лани објавивме дека Генералниот секретаријат на Владата, додека со него раководеше Рашковски, купил софтвер за сообраќајни прекршоци вреден 81 000 евра, иако ниедна институција ниту го барала ниту го користи, како и дека пред да го купи, како генерален секретар на Владата, тој лично развил таков софтвер за сообраќајни казни и го патентирал.
Рашковски тврдеше дека софтверот треба да биде дел од т.н. „Сејф сити“, но единствената институција со право да казнува, Министерството за внатрешни работи, брзо ја урна тезата на Рашковски со ставот дека ниту барало ниту планира да го користат софтверот за кој никој не го прашал.
Набргу потоа Обвинителството за гонење организиран криминал и корупција отвори предистрага, а потоа и истрага. Во истрагата беа споени и други предмети – набавки за уште еден софтвер за биометриска идентификација и исплата на хонорари од Генералниот секретаријат, по што на 8 октомври лани беше поднесено обвинение против Рашковски и шест други лица. Кривичен во целост во прифати обвинението на 29 декември 2021, а во моментов случајот е во судска постапка. Во судскиот процес досега обвинителството ги изнесе своите докази, а од минатото рочиште со изведување на свои докази започна и одбраната.