Русковска вели дека не се кае што по отворањето истрага за Рашковски не ја прифатила понудата да биде избрана за заменик-републички обвинител, а нејзиниот внук во скопското Вишо обвинителство. Освен за случајот со Рашковски, таа вели дека притисоци и закани за други предмети не добивала, но во телевизискиот настап, како еден од позначајните предмети, го спомена и случајот со станицата „Виа комерц“ каде технички преглед правел автобусот на „Беса транс“ од несреќата во Бугарија, а којашто требало претходно да биде затворена, но министерот Спасовски три месеци чекал за да го потпише решението
И двата случаи што Русковска ги истакна во вечерашниот настап ги отвори ,,360 степени”
Поранешната шефица на Основното јавно обвинителство за гонење организиран криминал и корупција (ОЈО ГОКК), Вилма Русковска, во вечерашното гостување во емисијата „Топ тема“ на ТВ Телма, изрази сомневања дека некој сакал да ја тргне од ова обвинителство кога го отворила случајот за набавката на софтверот за сообраќајни прекршоци од поранешниот генерален секретар на Владата, Драги Рашковски.
Случајот со предистрагата за поранешниот директор на Управата за финансиска полиција (УФП), Арафат Муареми, и претресот во оваа институција, поради што беше отворена дисциплинска постапка и има предлог за нејзино разрешување, таа вели го чекале само за да ја „фатат на пенал“.
„Пријавата беше само за поранешниот директор (Арафат Муареми). Би сакала да одговорам дека во аналите на македонското правосудство ќе влезе дека за наредба за претрес од суд, која е уште во сила, одговара обвинител што досега ниту се случило ниту во иднина мислам дека ќе се случи. Можам да кажам дека оваа одлука ја очекував. Не сум изненадена воопшто. Само сакам да кажам дека уште кога се отвори истрагата за господинот Драги Рашковски, мене ми беше понудено да ме изберат за заменик-републички обвинител. Кога не го прифатив тоа, го зголемија влогот и понудија покрај мој избор за заменик-републички обвинител, и внукот од сестра ми, кој е обвинител во Куманово, да биде избран во Вишото во Скопје. Јас и тоа го одбив“,
рече Русковска.
Обвинителката рече дека не сака да кажува имиња на тие што ѝ ја дале понудата, но одговори потврдно на констатацијата дека биле лица поврзани со Рашковски, кои биле на позиција од која може да понудат такво нешто.
„Сметам дека само чекаа за овој период од скоро две години, да се изразам со спортски жаргон, да ме фатат на пенал, а тоа беше отпочнувањето на предистрагата за работењето на директорот на Финансиската полиција“,
рече обвинителката.
Дали ако прифатела, тоа ќе значело повлекување на истрагата против Рашковски односно дали е тоа она што било барано за возврат, Русковска одговори:
„Можеби и тоа беше, не можам да влегувам во умот на другите, веројатно беше. Тогашниот премиер јавно изјави дека не ми верува мене, се работеше за овој предмет. И кога бевме сега на дисциплинската комисија, јас го предложив професорот Калајџиев за сведок експерт. Не беше прифатен како сведок, а како докази за дисциплинската постапка беа наведени само претставките од Арафат Муареми“,
рече Русковска.
Случајот го отвори „360 степени“ кога на 8 март март 2021 година ја објавивме првата сторија дека Генералниот секретаријат на Владата, додека со него раководеше Рашковски, купил софтвер за сообраќајни прекршоци вреден 81 000 евра, иако ниедна институција ниту го барала ниту го користи, како и дека пред да го купи, како генерален секретар на Владата, тој лично развил таков софтвер за сообраќајни казни и го патентирал.
По 10 дена, на 18 март 2021 г., Обвинителството за гонење организиран криминал и корупција отвори предистрага, а потоа, на 21 април 2021, случајот напредуваше во истрага. Во истрагата беа споени и други предмети – набавки за уште еден софтвер за биометриска идентификација и исплата на хонорари од Генералниот секретаријат, по што на 8 октомври 2021 година беше поднесено обвинение против Рашковски и шест други лица. Кривичен во целост во прифати обвинението на 29 декември 2021, а во моментов случајот е во завршница од судска постапка пред првостепениот суд.
Случајот со Рашковски е причина и за казната на обвинителката Трајчева, смета Русковска
Покрај предлог за разрешување на Русковска, Дисциплинската комисија за случајот со Муареми одлучи парично со 30 отсто на плата во период од шест месеци да биде казнета и обвинителката Ивана Трајчева, додека за Елизабета Јосифоска утврди дека нема одговорност.
Ексшефицата на ОЈО ГОКК смета дека предметот со Рашковски е причина и за казната за Трајчева бидејќи токму таа е обвинителката која ја водеше истрагата и го застапува обвинението во судница.
„Сметам дека голем придонес во нејзиното казнување има тој предмет“,
рече Русковска.
Таа рече и дека воопшто не се кае што не ја прифатила понудата за унапредување.
„Да, затоа што не сфатија дека никогаш не ми беше целта функција и фотелја. Едноставно, сакав и се изборив да станам шеф на ОЈО ГОКК од причина што сакав да почнам да ставам темели на една правна држава. Целата јавност знае во каква состојба беше ОЈО ГОКК претходно. Не немаше никаде на мапа. Затоа, и од оваа перспектива и гледна точка, воопшто не се каам затоа што тогаш не го прифатив тој предлог“,
вели обвинителката.
Русковска: Случајот ,,Виа комерц” беше во поодмината фаза, не знам до каде е сега
Русковска рече дека притисоци и закани, освен за случајот со Рашковски, немала, но во телевизискиот настап вечерва спомена уште неколку актуелни предмети што ги отворила нагласувајќи го случајот со станицата за технички преглед „Виа комерц“.
„Освен притисоците за Рашковски, кои во неколку наврати ги кажав, и заканите што ги имав, искрено, други пречки не сум имала. Но, покрај предметот што го отворив за Финансова полиција, односно против тогашниот директор, имаше уште еден предмет – да не заборавиме, отворена предистрага за станицата за технички преглед каде беше извршен технички преглед на автобусот на ’Беса транс‘ што изгоре во Бугарија каде за жал починаа 45 наши сограѓани“,
рече обвинителката.
За потсетување, случајот со „Виа комерц“ го отвори „360 степени“ уште крајот на 2021 година. Тогаш објавивме дека инспектори на МВР во август 2021 година предложиле привремено затворање на станицата за технички преглед поради серија констатирани недостатоци. Контролата била извршена на 12 август 2021, а предлогот-решение за забрана за работа од службите во МВР било изготвено на 25 август. Додека се чекал потписот од министерот Оливер Спасовски, автобусот на „Беса транс“ на 5 октомври лани бил на технички преглед. На 23 ноември лани се случи автобуската несреќа во Бугарија, а три дена по неа, на 26 октомври, Спасовски го потпишал решението.
Вечерва на констатацијата од новинарката дека ако некој дозволил такво нешто, всушност, се министерот Оливер Спасовски и комисијата (инспекторите), Русковска, иако не беше прецизна со датумите, посочи дека комисијата си ја завршила работата, а она што требало бил потписот од министерот.
„Комисијата има уште во јули донесено решение дека треба да биде затворена таа станица за технички преглед, решение кое требало да го потпише министерот. Но, министерот го потпишал три дена по несреќата … Колку што мене ми е познато, законска обврска е во рок од 15 дена да се потпише, а потпишано е после повеќе од три месеци“,
рече обвинителката.
Русковска рече дека не знае до каде е овој предмет сега. Она што го знае, додека била во ОЈО ГОКК, е дека случајот бил во поодмината фаза, целата документација била собрана од СВР Скопје и од управните служби во МВР и од Град Скопје.
„Исчезнаа докази за проневера на европски фондови“
Уште еден интересен момент што го спомена Русковска во вечерашното гостување во „Топ Тема“, беше за периодот додека таа беше суспендирана, кога тврдеше дека ѝ биле испразнети фиоките од канцеларијата. Тогаш, вели таа, при празнењето исчезнале докази за предмет поврзан со злоупотреба на европските фондови.
„Немам никакви тајни во фиоките, знам дека електронски докази што беа испратени од ОЛАФ, тоа е финансиска полиција на ЕУ која работи за проневера на европски фондови, ги снема. После повторно беа пратени од страна на ОЛАФ“,
рече Русковска.