Обвинителките имаат право да поднесат жалби до Советот на јавни обвинители за одлуката на Комисијата за утврдување дисциплинска одговорност
Комисијата за утврдување на дисциплинска одговорност донесе одлуки за трите обвинителки: Вилма Русковска, Ивана Трајчева и Елизабета Јосифоска, откако за нив беше отворена постапка поради претресот во Управата за финансиска полиција (УФП) минатото лето.
За Русковска, Комисијата одлучила да му предложи на Советот на јавни обвинители да биде разрешена.
„За поранешната основна јавна обвинителка на Основното јавно обвинителство за гонење на организиран криминал и корупција е утврдено дека е одговорна за сторена тешка дисциплинска повреда од член 91 алинеја 6 од Законот за Јавното обвинителство и Комисијата одлучи да поднесе предлог за нејзино разрешување до Советот на јавните обвинители“,
соопштија од Јавното обвинителство.
За една од останатите две обвинителки е утврдена тешка дисциплинска повреда и е изречена мерка – намалување на месечната плата во висина од 30 отсто од исплатената нето-плата во траење од шест месеци, додека за другата Комисијата одлучила да ја ослободи од одговорност бидејќи не се докажало дека сторила тешка дисциплинска повреда.
Од Oбвинителството не наведуваат која мерка за која обвинителка е донесена, но како што дознаваме, казната на плата е за Трајчева, додека Јосифоска е ослободената од одговорност.
„Против решението на Комисијата за утврдување на дисциплинска одговорност на јавен обвинител во вршење на јавнообвинителската функција незадоволните страни имаат право на жалба пред Советот на јавните обвинители“,
велат од Јавното обвинителство.
Предлогот да се поведе дисциплинска постапка го даде републичкиот обвинител Љубомир Јовески, кој дополнително по Русковска ја суспендира и од работа.
Претресот од УФП од страна на ОЈО ГОКК беше извршен на 18 јули лани и со него се чини дека ескалираше антагонизмот помеѓу Русковска и тогашниот директор на Управата, Арафат Муареми.
Муареми тогаш јавно обвинуваше за незаконит претрес и најави и кривични пријави против трите обвинителки.
Тогаш, по налог на Јовески беше извршен и надзор, по што од Јавното обвинителство излегоа со соопштение дека констатирале пропусти во постапувањето при претресот во УФП, меѓу што посочија и дека во барањето за претрес до судот што го поднеле обвинителките било наведено дека има основи на сомнение за сторено кривично дело, а во списите од предметот имало само анонимна кривична пријава.
Русковска, пак, овој предмет го наведе еден од трите (заедно со тој за поранешниот генсек на Владата Драги Рашковски и за станицата за технички преглед „Виа комерц“) што придонеле таа да биде суспендирана.