Според Маричиќ, се очекува Фон дер Лајен да ги најави извештаите на ЕК за напредокот на земјите кандидати за членство во ЕУ, чие објавување е предвидено за 8 ноември, како и да ги презентира основните црти на Планот за раст на Западниот Балкан, што би требало да биде објавен до крајот на оваа година
Претседателката на Европската комисија, Урсула фон дер Лајен в понеделник доаѓа во Скопје на средба со државниот врв. Датумот за посетата на Фон дер Лајен го најави вицепремиерот за европски прашања Бојан Маричиќ на крајот на неговата работна посета на Брисел.
Маричиќ вели дека со претседателката на Европската комисија, Урсула фон дер Лајен ќе се разговара за потребните и неопходните реформи и за дополнителните средства што треба да ги добиеме како помош од ЕУ и мотивација за реформите. Според вицепремиерот ќе се разговара и за оние обврски што ни преостануваат, за да, како што вели, ја комплетираме оваа фаза на пристапувањето и да преминеме во втората, односно отворањето на кластерот и со тоа да го најавиме и крајот на скринингот.
„Секоја посета на високо ниво од овој калибар ја сметаме за добар сигнал за нашиот регион. Да не заборавиме дека минатата недела имаше Самит од Берлинскиот процес во Тирана, каде што исто така беше присутна и претседателката на Европската комисија. Таму најави дека ќе има турнеја низ Западниот Балкан. Таа турнеја почнува токму од кај нас, од Скопје, од Северна Македонија и сметам дека тоа ќе е добар сигнал“,
вели Маричиќ во изјава за МИА.
Според него, се очекува таа да ги најави извештаите на ЕК за напредокот на земјите кандидати за членство во ЕУ, чие објавување е предвидено за 8 ноември, како и да ги презентира основните црти на Планот за раст на Западниот Балкан, што би требало да биде објавен до крајот на оваа година.
„Тоа е еден план којшто ни овозможува имплементација на некои политики на ЕУ во нашите земји уште пред членството. Значи, тоа е еден вид на интеграција пред членство. Тоа е план којшто треба да ни овозможи повеќе шанси за нашите млади, за нашата бизнис заедница и план кој треба да ни овозможи повеќе шанси и за институциите и за граѓаните пред пристапувањето во ЕУ“,
додава Маричиќ.
Вицепремиерот за европски прашања додава дека се очекува во првата недела на декември да заврши комплетниот скрининг процес, по што понатаму ќе работиме само на извештаите за секој кластер.
„Процесот на скрининг е една многу важна операција за нас и многу корисна вежба која ни даде слика каде сме, што сме направиле, кои се нашите досегашни достигнувања, но и што е она што треба да го направиме, кои се нашите слабости и како тие да ги преведеме во еден план за реформи за наредните седум години и токму тоа го правиме во моментот. Ние таа домашна задача ќе ја завршиме успешно“,
додава Маричиќ.
Сепак, според него, за да го задржиме темпото со Албанија, но и со другите земји кандидати за членство, ќе треба да ги спроведеме уставните измени.
„Секој ден покасно, секое доцнење во врска со уставните измени, е ден загуба за Северна Македонија, ден загуба за нашите граѓани. Првпат имаме вистинска можност да разговараме за проширување на ЕУ до 2030 година. Сите најави одат во насока дека Европската комисија подготвува план со којшто ќе овозможи на оние држави коишто ќе бидат подготвени, коишто ќе ги направат неопходните реформи да влезат во Европската Унија во 2030 година. Наша заложба е ние да бидеме дел од тие држави, а тоа е можно само ако сите политички актери и сите пратеници ја преземат одговорноста на себе и ги донесат неопходните одлуки“,
вели Маричиќ.
Посетата на претседателката на Европската Комисија Урсула фон дер Лајен изминатиот период ја најавуваше и премиерот Димитар Ковачевски. Тој вчера рече дека доаѓа голем пријател на нашата земја и додаде дека продолжувањето на евроинтегративниот пат на земјата ќе биде една од клучните теми за кои ќе се разговара за време на посетата на Фон дер Лајен.
Лидерот на опозициската ВМРО-ДПМНЕ, Христијан Мицкоски, вели дека засега не е договорена заедничка средба со претседателката на Европската комисија, Урсула фон дер Лајен. Прашан дали нејзиното доаѓање во земјава ВМРО-ДПМНЕ го чувствува како притисок во врска со гласањето на уставните измени, Мицкоски рече дека секој добронамерник кој е заинтересиран за состанок со него е добредојден.
Претседателката на Европската комисија (ЕК), Урсула фон дер Лајен, и минатата година во октомври беше во посетата на земјата, од каде што ја почна турнејата низ земјите од Западен Балкан.
Целта на посетата беше таа да ја претстави дополнителната поддршка од ЕУ за Северна Македонија и регионот во справувањето со актуелната енергетска криза.