Според најавите на министерот за надворешни работи Бујар Османи, шефицата на ЕК Урсула фон дер Лајен денеска во Скопје треба да го презентира пакетот за енергетска поддршка од Европската комисија за регионот во вредност од една милијарда евра
Шефицата на Европската комисија Урсула фон дер Лајен денеска попладне се очекува да пристигне во Северна Македонија и со тоа официјално да ја започне нејзината турнеја низ земјите на Западен Балкан која ќе биде посветена на енергетската криза.
Според најавите, таа ќе биде пречекана пред платото на Владата од страна на владина делегација предводена од премиерот Димитар Ковачевски.
Псетата на Фон дер Лајен, како што најавија претходно од ЕК, е во контекст на војната во Украина и енергетската криза, а целта е да му се пренесе на регионот дека тој е важен за Европската Унија.
Еден дел од помошта во областа на енергетската криза, како што најави Фон дер Лајен минатата недела од Стразбур, ќе биде вклучувањето на земјите од Западен Балкан за заедничко купување енергенси со земјите од ЕУ.
Министерот за економија Крешник Бектеши минатата недела најави дека до Европската комисија ќе испрати барања до за директна помош за индустријата, како и барање за кофинансирање на проектите и субвенциите за сите домаќинства и компании. Тој не прецизираше за колкава сума парична помош станува збор, и најави дека одговорот од ЕК ќе се знае со посетата на Фон дер Лајен во Скопје.
Министерот за надворешни работи Бујар Османи минатата недела најави дека пакет за енергетска поддршка од Европската комисија за регионот во вредност од една милијарда евра ќе биде презентиран неделава во Скопје од претседателката на ЕК Урсула фон дер Лајен.
По посетата во Скопје, претседателката на ЕК ќе отпатува во Приштина и Тирана в четврток, Сараево и Белград в петок и Подгорица во сабота.
Во Србија се очекува претседателката да го повтори барањето на ЕУ, Белград да воведе санкции против Русија.
Поради посетата на Фон дер Лајен од МВР најавија посебен сообраќаен режим за денеска и утре по сообраќајниците на поширокото централно подрачје на Град Скопје.