Од Владата, според планираната реконструкција, ќе заминат уште тројца министри и двајца заменици од Алтернатива, како и еден заменик-министер од „огнената група“ во ДУИ. Тие не поднесоа оставки, туку премиерот Ковачевски предложи нивно разрешување
На почетокот на 103. седница на Собранието беа констатирани оставки на четворица членови на Владата – двајца министри и двајца заменик-министри.
Станува збор за министрите за правда Никола Тупанчески и за животна средина и просторно планирање Насер Нуредини, како и за заменик-министрите за правда Агим Нухиу и за здравство Владимир Рендевски.
Спикерот Талат Џафери на почетокот на седницата за сите посочи дека го известиле оти нема да ги образложат оставките.
Констатирањето на нивните оставки е во пресрет на реконструкцијата на Владата, за што во парламентот е закажана седница за денеска во 15 часот.
Досегашниот заменик за правда Агим Нухиу само неколку часа ќе биде без функција бидејќи попладнево се очекува да биде избран за заменик-министер за образование и наука.
Реконструкцијата на Владата доаѓа откако владејачкиот СДСМ се договори со Алијанса за Албанците да биде нов владин партнер, додека досегашниот – Алтернатива, одлучи да премине во опозиција.
Министрите кои сами поднесоа оставка се кадри кои беа избрани на предлог на СДСМ (Тупанчески и Рендевски) и на ДУИ (Нуредини и Нухиу).
Од Владата ќе заминат уште тројца министри и тројца заменици, за што премиерот Димитар Ковачевски испрати предлог за разрешување до Собранието.
Станува збор за министрите за здравство – Беким Сали, за информатичко општество и администрација – Адмирим Алити и министерот без ресор задолжен за дијаспора Џемаил Чупи, како и замениците за земјоделство – Абдулшуќур Абедини и за образование и наука – Лулзим Алиу. Сите се кадри на Алтернатива.
Третиот заменик-министер предложен за разрешување е Башким Хасани кој е во Министерството за одбрана, а е дел од „огнената група“ во ДУИ.
На истата седница, чиј почеток е закажан во 15 часот, треба да се изберат и новите членови на Владата кои ќе дојдат на местата на разрешените и оние што си поднесоа оставки.
Предложените нови министри се:
- Кренар Лога (Алијанса) – министер за правда;
- Фатмир Меџити (Алијанса) – министер за здравство;
- Азир Алиу (Алијанса) – министер за информатичко општество и администрација;
- Каја Шукова (СДСМ) – министерка за животна средина и просторно планирање;
Предложените заменик-министри се:
- Тирон Јајага (Алијанса) – заменик-министер за одбрана;
- Вјолца Бериша (Алијанса) – заменик-министерка за земјоделство;
- Викторија Аврамовска-Мандиќ (СДСМ) – заменик-министерка за правда;
- Маја Манолева (СДСМ) – заменик-министерка за здравство;
- Агим Нухиу (ДУИ) – заменик-министер за образование и наука.
