Математиката, во која влегуваат повеќе варијабли во кои се артикулирани ставовите на „огнената група“ на ДУИ, два-тројца независни пратеници кои претходно беа дел од Алтернатива и Беса, а сега дејствуваат како независни, како и пратеникот на актуелното мнозинство Павле Трајанов, покажува дека бројот на пратениците што би ја поддржале реконструкцијата на Владата би требало да се движи од 64 до 66 народни претставници
Бројката од 64 пратеници може да се намали уште за еден доколку Мендух Тачи од Демократската партија на Албанците реши да не даде поддршка, со оглед на тоа што членовите од Алијанса за Албанците претходно беа дел од ДПА, а Тачи неодамна доби и двегодишна затворска казна во повтореното судење во случајот „Титаник 2“
автори: Бранислав Закев и Катерина Спасовска-Трпковска
Во пресрет на денешната собраниска седница, на која на дневен ред се оставките и разрешувањата на дел од актуелните и расправа и гласање за избор на нови министри и заменик-министри, едно од прашањата што се наметнува е колку пратеници ќе дадат поддршка за предлогот на премиерот Димитар Ковачевски за реконструкција на Владата.
Досегашното владино мнозинство во Собранието имаше 64 пратеници на хартија (иако секогаш не беше така и во пракса). Во таа бројка од 64 беа тројцата пратеници на Алтернатива кои од вчера веќе не се дел од владејачкото мнозинство и најавија дека ќе дејствуваат како опозиција.
Од Алтернатива во Собранието беа Африм Гаши, Хусни Исмаили и Сафије Садики Шаини. Алтернатива во својот табор во Собранието имаше уште еден пратеник – Скендер Реџепи Зејд, но тој на 11 јуни реши да ја напушти партијата и оттогаш во парламентот дејствува како независен.
Со излегувањето на Алтернатива од Владата, мнозинството останува со 61 пратеник. Новиот партнер на владејачкото мнозинство – Алијанса за Албанците во Собранието има осум пратеници, што парламентарното мнозинство, според математиката, треба да го искачи до бројката од 69.
Сепак, не може да се каже дека оваа бројка ќе го отслика владејачкото мнозинство и во реалната конјуктура бидејќи проекцијата од 69 пратеници на „стаклени нозе“ ја држат тројцата пратеници од т.н. „огнена група“ на ДУИ, кои најавија дека нема да гласаат за денешниот предлог на премиерот Димитар Ковачевски.
Пратеникот од редовите на ДУИ и член на „огнената група“ од оваа партија, Изет Меџити, вели дека „огнените“ нема да ги поддржат предложените промени во Владата.
Освен Меџити, дел од т.н. „огнена група“ се и пратеничката Мерита Коџаџику и пратеникот Кастриот Реџепи, кој по разидувањето со Беса дејствува како независен во парламентот, а се појавува на теренските средби што „огнените“ ги имаат со членови на ДУИ.
Со нивно негласање за предлог-реконструкцијата, владиното мнозинство од 69 пратеници се намалува на 66.
Она што останува нејасно е дали Скендер Реџепи Зејд, кој дејствува како независен, ќе биде „за“ предлогот на Ковачевски. „360 степени“ веќе објави дека тоа што заменик-министерот за култура Даим Лучи, избран на предлог на Алтернатива, не е на списокот на Ковачевски за разрешувања може да се смета како сигнал дека станува збор за кадар близок на Реџепи Зејд, а соодветно на тоа и дека независниот пратеник би гласал „за“ предложената реконструкција.
Исто така, неизвесно е и дали Павле Трајанов, кој е единствен претставник на Демократскиот сојуз во Собранието и е дел од парламентарното мнозинство, ќе ја даде поддршката за реконструкцијата на Владата. Тој најави дека сака да ги види програмските определби на Алијанса за Албанците (АА) пред да донесе конечна одлука дали ќе ја поддржи владината реконструкција.
Претходно, на 20 јануари, лидерот на Демократскиот сојуз во гостување на ТВ Сител рече дека нема да гласа за влада што го нарушува основниот принцип на соодветна и правична застапеност во органите на власт.
Тој тогаш изјави дека ќе почека прво да види како ќе биде компонирана владата, посочувајќи дека доколку ДУИ, Алијанса за Албанците и Алтернатива се согласат да поделат места во Владата, во тој случај ќе поддржи таква влада, но, како што рече, „ако се нарушуваат основните принципи, овој преседан може да направи опасни поделби во државата“.
Доколку Реџепи и Трајанов не ја поддржат предлог-реконструкцијата, бројот на оние што би гласале „за“ би паднал на 64 пратеници.
Бројката од 64 пратеници може да се намали само доколку Мендух Тачи од Демократската партија на Албанците реши да не даде поддршка, со оглед на тоа што членовите од Алијанса за Албанците претходно беа дел од ДПА, а Тачи неодамна доби и двегодишна затворска казна во повтореното судење во случајот „Титаник 2“.