Како што продолжуваат борбите, продолжува и референдумското гласање во четирите области под контрола на Москва – гласање што Украина и нејзините западни сојузници го отфрлија како измама
Во самопрогласените народни републики Луганск и Донецк, луѓето се прашуваат „Дали го поддржувате пристапувањето на вашата република во Русија како федерален субјект?“. Во Запорожје и Херсон, пак, референдумското прашање е „Дали се залагате за отцепување на регионот од Украина, создавање независна земја и последователно пристапување кон Русија како федерален субјект?“
Руските сили извршија нови напади врз украинските градови на еден ден по отпочнувањето на референдумите за приклучување кон Русија во четирите окупирани украински региони.
Гувернерот на Запорожје, Олександр Старук, изјави дека Русите извршиле напади врз инфраструктурни објекти во градот Днепропетровск, при што едно лице загинало, а неколку други се повредени. Руските сили, како што соопштија украинските власти, погодиле и други области во Украина, при што биле оштетени станбени згради и цивилна инфраструктура.
Британското Министерство за одбрана соопшти дека Русија е насочена кон браната Печенихи на реката Северски Донец во североисточна Украина, по претходните напади на браната во близина на градот Кривји Рих, кои предизвикаа поплави на реката Инхулец. Британското МО соопшти дека Украинците напредуваат и оти Русите најверојатно се обидувале да ги погодат браните за да ги поплават местата каде што поминувала украинската војска.
Како што продолжуваат борбите, продолжува и референдумското гласање во четирите области под контрола на Москва – гласање што Украина и нејзините западни сојузници го отфрлија како измама.
Администрацијата контролирана од Москва, во регионите Луганск и Донецк на исток и Херсон и Запорожје на југ, спроведува референдумско гласање за приклучување на овие региони кон Русија. Гласањето започна на 23 септември, а треба да трае до вторник, 27 септември.
Што се прашува на референдумите?
Во самопрогласените народни републики Луганск и Донецк, луѓето се прашуваат „Дали го поддржувате пристапувањето на вашата република во Русија како федерален субјект?“. Во Запорожје и Херсон, пак, референдумското прашање е „Дали се залагате за отцепување на регионот од Украина, создавање независна земја и последователно пристапување кон Русија како федерален субјект?“.
Во Луганск и Донецк гласачките ливчиња се печатат само на руски јазик, а во Запорожје и Херсон гласачкото ливче е на украински и руски јазик.
На петдневното референдумско гласање кое започна во петокот, претставниците на изборите придружувани од полицајци носеа гласачки ливчиња до домовите и поставија мобилни избирачки места, поради безбедносни причини. Гласањето треба да заврши во вторник, 27 септември, кога ќе се гласа на избирачките места.
Руската новинска агенција Тасс информира дека поради тековните напади, значителен број жители на Донбас, Запорожје и Херсон биле принудени да ги напуштат своите домови, но тие ќе имаат можност да го дадат својот глас надвор од тие територии, вклучително и во Русија.
Референдумите на осуда од Украина и Западот
Украина и Западот рекоа дека референдумското гласање во четирите украински области е нелегитимен обид на Москва да отсече голем дел од земјата, што се протега од руската граница до полуостровот Крим.
Во своето обраќање, Зеленски упати и порака до сите Украинци кои во моментов се наоѓаат на окупираните територии, порачувајќи им да направат се за да си го спасат животот и да помогнат во ослободувањето на Украина.
Украинскиот претседател Володимир Зеленски ги повика Украинците во окупираните региони да си го спасат животот и да помогнат во ослободувањето на Украина и да се обидат да ја избегнат мобилизацијата на Москва објавена во средата.
„Сокријте се од руската мобилизација на секој начин. Избегнувајте писма за регрутирање. Обидете се да стигнете до слободната територија на Украина. Но, ако веќе влезете во руската армија, тогаш саботирајте каква било активност на непријателот, попречете какви било руски операции, дајте ни какви било важни информации за окупаторите – нивните бази, штабови, магацини со муниција“,
нагласи украинскиот претседател во своето обраќање до нацијата.
Лидерите на земјите од Г7 денеска објавија соопштение во кое ги осудуваат таканаречените референдуми во Русија во четирите украински региони, кои се делумно контролирани од Москва.
Во соопштението на лидерите на Г7 се додава дека тие никогаш нема да ги признаат овие референдуми, кои, како што велат, се чини дека се чекор кон руската анексија. Лидерите ги повикаа сите земји да ги отфрлат овие, како што ги нарекоа, лажни референдуми, кои се обид на Русија да ги прикрие прекршувањата на меѓународното право.