Во своето секојдневно обраќање кон нацијата, украинскиот претседател го повика светот да ги осуди, како што ги нарече, „псевдореферендумите“ организирани од Русија кои во моментов се одржуваат на четирите украински територии кои се освоени од руските сили – Донецк, Луганск, Херсон и Запорожје
Зеленски упати и порака до сите Украинци кои во моментов се наоѓаат на окупираните територии, порачувајќи им да направат се за да си го спасат животот и да помогнат во ослободувањето на Украина
Додека руските власти тврдат дека референдумите во окупираните украински области за приклучување кон Русија се можност за луѓето да го кажат своето мислење, украинскиот претседател Володимир Зеленски вели оти тие се злосторство против народот.
Во своето секојдневно обраќање кон нацијата, украинскиот претседател го повика светот да ги осуди, како што ги нарече, „псевдореферендумите“ организирани од Русија кои во моментов се одржуваат на четирите украински територии кои се освоени од руските сили – Донецк, Луганск, Херсон и Запорожје.
Зеленски изрази уверување дека светот правилно ќе реагира на референдумите и јасно ќе ги осуди.
„Тоа не е само злосторство против меѓународното право и украинското право, тоа е злосторство против народот“,
додаде тој.
Во своето обраќање, Зеленски упати и порака до сите Украинци кои во моментов се наоѓаат на окупираните територии, порачувајќи им да направат се за да си го спасат животот и да помогнат во ослободувањето на Украина.
„Сокријте се од руската мобилизација на секој начин. Избегнувајте писма за регрутирање. Обидете се да стигнете до слободната територија на Украина. Но, ако веќе влезете во руската армија, тогаш саботирајте каква било активност на непријателот, попречете какви било руски операции, дајте ни какви било важни информации за окупаторите – нивните бази, штабови, магацини со муниција“,
нагласи украинскиот претседател во своето обраќање до нацијата.
Администрацијата под контрола на Москва, во четирите украински области – Луганск и Донецк на исток и Херсон и Запорожје на југ, вчера започна со спроведување на четиридневното гласање на референдумите за приклучување кон Русија.
Спроведување референдуми со месеци наназад се споменуваше од страна на проруските сили, меѓутоа неодамнешните успеси на Украина која спроведе контраофанзива и врати под своја контрола големи делови од окупираната територија ги поттикнаа властите контролирани од Русија да го закажат гласањето.
Украина, западните лидери и Обединетите нации го осудија гласањето како нелегитимен чекор што води кон незаконска анексија на територија.
Соединетите Американски Држави се подготвени да воведат дополнителни санкции кон Русија во соработка со своите сојузници, доколку Москва започне со анексија на делови од украинската територија, соопшти Белата куќа. НАТО, пак, ќе ја засили својата помош за Киев како одговор на „лажните“ референдуми, изјави генералниот секретар на Алијансата Јенс Столтенберг.