Иако нејзиното разрешување се перцепира како кулминација на судирот во ДОМ, претседателката на оваа партија Маја Морачанин вели дека не го дала предлогот за смена на Петровска поради внатрепартиските превирања, туку поради поплаки што стигнувале за работата на ДИЖС
Иако сум разрешена од сите функции, не сум разрешена од ДОМ. Нема причина да не останам во партијата се додека таа се грижи за зелената агенда, вели за „360 степени“ Ана Петровска, која попладнево беше разрешена од директорската функција во Државниот инспекторат за животна средина (ДИЖС).
Таа вели дека не е изненадена од владината одлука за нејзино разрешување.
„Немав најава, ама имаше навестувања дека ќе се случи тоа“,
ни изјави Петровска, на прашање дали ѝ било најавено дека ќе биде разрешена од функцијата.
Петровска вели дека се враќа на старата работна позиција во Министерството за животна средина, каде што едно време беше и државна секретарка.
„Беше посебно задоволство да ја извршувам функцијата во ДИЖС, каде што на најдиректен начин можев да придонесам за животната средина. Успеавме да решиме доста проблеми, а оние што останаа ќе ги решава мојот наследник. Јас се враќам во Министерството, каде што и натаму ќе работам за животната средина“,
вели Петровска.
Иако нејзиното разрешување се перцепира како кулминација на судирот во ДОМ, која е дел од владејачкото мнозинство, претседателката на оваа партија Маја Морачанин вели дека не го дала предлогот за смена на Петровска поради внатрепартиските превирања, туку поради поплаки што стигнувале за работата на ДИЖС.
„Тие случувања во ДОМ беа поодамна, пред неколку месеци. Независно од тоа, до ДОМ стигнуваа забелешки за раководењето со Инспекторатот, во однос на недоволна транспарентност и ажурност на институцијата, како и за нарушени меѓучовечки односи. Во секој случај, добро е што ги зголемиле инспекциските надзори, ама што е со санкциите, посебно за големите загадувачи“,
изјави Морачанин за „360 степени“, потврдувајќи дека разрешувањето на Петровска е на барање на раководството на ДОМ, ама негирајќи дека тоа е поради несогласувања со Петровска.
На забелешките од Морачанин за досегашното раководење со ДИЖС, Петровска кусо одговара дека е нормално кога некој нешто бара да најде аргументи за да го поткрепи своето барање пред јавноста.
Владата денеска назначи и нов в.д. директор на Инспекторатот. Тоа е Сретен Стојковски, за кој Морачанин потврди дека, исто така, е кадар на ДОМ, вработен во ДИЖС, технолошки инжењер и магистер по животна средина.
Во мај годинава, Петровска остана без функциите во ДОМ, кога Центраниот одбор на партијата им изгласа недоверба на неа и на тогашниот пратеник Мирослав Богдановски. Петровска и Богдановски беа разрешени од потпретседатели и од членови на Извршниот одбор.
Петровска тогаш потврди дека со Богдановски (и Јасмина Пакашка, која беше разрешена од ИО) биле дел од иницијативата за вонреден конгрес на ДОМ, поради судир на ставови во партијата. Но, како што рече, наишле на непријателска атмосфера меѓу сопартијците.
Набрзо потоа, Богдановски објави дека ќе дејствува како независен, наместо како пратеник на ДОМ, ама дека останува дел од парламентарното мнозинство. Сепак, кон крајот на јуни, Богдановски поднесе оставка во Собранието и објави дека се враќа на старото работно место – во Инспекторатот на град Скопје.