Зошто Ана Петровска, актуелна директорка на Државниот инспекторат за животна средина, и Мирослав Богдановски, пратеник во Собранието, останаа без потпретседателските позиции во партијата ДОМ?
Петровска, за „360 степени“, потврдува дека биле дел од иницијативата за одржување вонреден конгрес поради различни внатрепартиски ставови, но вели дека на денешната седница наишле на непријателска атмосфера.
„Ова ситуација не е нова. Имавме различни ставови во однос на тоа како да се бориме за нашата зелена агенда и сакавме да ги отвориме различните ставови и да воведеме копретседателство. Преку седница на Централниот одбор имаме статутарна можност да закажеме и вонреден конгрес. Таа иницијатива е за да зајакнеме како партија. Но, денеска наидовме на една многу чудна, непријателска атмосфера. Се стави на гласање прво довербата, наместо да се дискутира за самата иницијатива. Одеднаш се доби сосема поинаква слика, како да било подготвено да се неутрализира тоа, да не исклучат од нашите партиски позиции. Ја напуштивме седницата, изразивме несогласување со начинот на кој се водеше“,
вели Петровска и укажува дека зад иницијативатa за вонреден конгрес стоеле повеќе членови на Централниот одбор и две третини од општинските организации, како и дека денеска се оневозможило онлајн гласање.
Претседателката на партијата, Маја Морачанин, вели дека иако партискиот Статут, како демократска вредност, дозволува да се поднесуваат и иницијативи за вонреден конгрес, сепак, за да се прифати такво нешто, потребно е Централниот одбор да даде зелено светло.
„Секоја инциијатива е вредна за разгледување. Ја пратија во петокот и веќе денеска имаше седница на Централниот одбор. Сепак, најголем дел од самите иницијатори не присуствуваа на седницата. Интересно е што и иницијатори го напуштија настанот, бидејќи членовите на Централниот одбор побараа да се разгледа и прашањето за доверба. Во иницијативата се наведуваше дека треба вонреден конгрес за нов Централен одбор, нов Надзорен, дел од Извршниот итн. Многу нејасно. Бараа и двајца копретседатели, по примерот на европските зелени. Така е, некаде има, но сосема е друга организацијата. Кај нас и Законот за партии не препознава копретседатели. Затоа е отфрлена иницијативата, а претходно Централниот одбор изгласа недоверба, едноставно луѓето немаа доверба во нив“,
вели Морачанин.
Од четири потпретседатели на ДОМ, сега останати се само двајца, Бети Дејанова и Христа Најданов. Во рок од 30 дена партијата би требало да ги пополни двете празни места.
Освен од потпретседателските функции, за Петровска и Богдановски е изгласана недоверба и како членови на Извршниот одбор на партијата. Покрај нив двајца, доверба за да остане член на Извршниот одбор не добила ниту Јасмина Пакашки.
Партијата вечерва со писмено соопштение извести дека Централниот одбор одржал седница со физичко присуство и ковид-протоколи, на која била разгледана, како што е наведено, „нелегитимната иницијатива за одржување вонреден конгрес“.
„Мнозинството членови на Централниот одбор едногласно ја отфрли иницијативата, со образложение дека нема потреба од одржување на вонреден конгрес. Членовите истакнаа дека сега фокусот на ДОМ треба да биде подготовка за претстојните локални избори, а не задоволување на лични интереси на поединци“,
се вели меѓу другото во соопштението.