Пораките биле испратени на украински, но и на англиски јазик со голем број правописни грешки, што кај голем дел од граѓаните уште во првите минути предизвикало сомнеж дека станува збор за кибернапад
Засега не е официјално потврдено кој стои зад киберинцидентот, а според руски извори и медиумски канали поврзани со безбедносните служби, одговорноста за нападот наводно ја презела хакерската група „Хиткор“ (Hitcore) – тврдења кои засега не можат независно да се потврдат
Системот за итни предупредувања на мобилните телефони во Украина синоќа испратил лажна тревога до жителите на Киев за наводен нуклеарен и хемиски напад, како и за можни улични борби низ главниот град. Според извештаите, станува збор за упад на засега непознати хакери во системот на официјалната апликација за известување на украинската цивилна заштита.
Како што пренесе британски „Гардијан“, првите пораки преку мобилната апликација започнале да пристигнуваат вчера вечерта, нешто пред 23 часот по локално време. Покрај предупредувањето за високо ниво на нуклеарна радијација, во известувањата пишувало дека на Киев му се заканува опасност и од хемиски и од директни напади со балистички ракети од типот „Орешник“ – оружје што руските сили веќе го имаат употребено неколку пати од почетокот на инвазијата врз земјата.
Пораките биле испратени на украински, но и на англиски јазик со голем број правописни грешки, што кај голем дел од граѓаните уште во првите минути предизвикало сомнеж дека станува збор за кибернапад. Сепак, кај дел од жителите се појавила паника, бидејќи помислиле дека станува збор за автентична порака.
„За момент претрпев огромен страв. Лежев на креветот и се прашував што следува“,
изјавила за „Гардијан“ жителка на Киев, која се претставила како Нина.
Официјален Киев привремено ја суспендира апликацијата
Украинската служба за итни случаи преку соопштение потврди дека „неовластени лица“ го презеле контролниот механизам врз апликацијата. Како мерка на претпазливост, каналот за известување е привремено суспендиран, а граѓаните биле предупредени во никој случај да не кликаат на линковите содржани во сомнителните пораки.
Засега не е официјално потврдено кој стои зад киберинцидентот. Руски официјални лица наводно изјавиле дека хакери испратиле лажни поради и кај нив, откако упаднале во систамот на апликацијата за итни случаи на тамошното Министерство за вонредни состојби во Москва. Во една од нивните објави била спомената хакерската група „Хиткор“ (Hitcore), која наводно ја презела одговорноста за нападот врз украинската апликација. Сепак, оваа информација досега „Гардијан“ не можел да ја потврди од независни извори.
Нападите доѓаат по истекот на примирјето во Олешки
Инаку, хакерскиот напад со лажните нуклеарни закани се случил речиси во исто време кога истече шестдневното локално примирје за евакуација на цивили од градот Олешки во јужниот дел на Украина, кој е под руска котнрола. Веднаш по 23 часот, Русија ги обнови воените дејствија во Херсон, при што утринава руски дрон погодил локална болница.
Додека траеше примирјето – за кое Вашингтон тврди дека било договорено со посредување на првата дама на САД, Меланија Трамп – украинските воени извори реагираа дека руските сили го искористиле прекинот на огнената линија за ротација на војници и засилување на своите позиции на брегот на реката Днепар.
Иако претставниците на Украина изразија подготвеност за слични хуманитарни паузи и на други делови од фронтот, Кремљ преку портпаролот Дмитриј Песков соопшти дека заземањето подобри тактички позиции за време на примирје било „стандардна практика“ и оти најверојатно и украинските сили го сториле истото. Според Песков, засега нема планови за нови прекини на огнот.