Кој го одобрил влезот на Алта банка во Македонија и под кои услови Мацура станал претседател на Надзорниот одбор, прашува Бучковски

Спасеновски оценува дека случајот веќе се прелеал во домашната политика, за што сведочат меѓусебните обвинувања на ВМРО-ДПМНЕ и СДСМ и изјавите на премиерот и на гувернерот

Случајот со Алта банка во Србија веќе влијае врз политичката дебата во Македонија, оцени професорот Александар Спасеновски во „360 степени“ на МРТ 1. Поранешниот премиер Владо Бучковски, пак, смета дека по апсењето на Давор Мацура во Србија треба да се испитаат две одлуки донесени во земјава – одобрението за влез на српската банка на македонскиот пазар и согласноста Мацура да застане на чело на Надзорниот одбор на Алта банка АД Битола.

Спасеновски ги посочи реакциите на двете најголеми македонски партии, на премиерот и на гувернерот како пример колку брзо еден настан во Србија станува домашно политичко прашање. На прашањето дали и други случаи би можеле да добијат македонска димензија, тој рече дека во овој момент не може да посочи конкретен случај. Очекува, сепак, дел од дебатите што се отвораат во Белград да се пренесат и во Скопје, меѓу другото, и поради врските на македонските партии со нивните политички партнери во Србија.

Во Србија уапсени се три лица во случајот Алта банка, се сомнева дека сопственикот Давор Мацура изнел над 380 милиони евра од трезорот

Бучковски очекува случајот со банката да им нанесе сериозна штета на власта и на Народната банка. Тој се повика на наводи на српскиот адвокат Ниниќ, кој, според Бучковски, ги спомнал Македонија и Русија во врска со трансфери на пари.

„Прво, за мене е неверојатно кој ја даде дозволата Алта банка да влезе во Македонија и кои беа мотивите. Тоа треба да се испита. Второ, кој даде согласност претседател на Надзорниот одбор да биде господинот Мацура, кој денеска е во апс. Значи, не може да нема реперкусии во Македонија“,

рече Бучковски.

Прашан кои други случаи од Србија би можеле да отворат прашања и за македонските институции, Бучковски ја спомена истрагата за петте тони марихуана кои тргнаа од Македонија. Како друга можна врска ги посочи финансирањето на дел од српските медиуми и присуството на нивните содржини на македонските национални телевизии. Кој би можел да биде опфатен со евентуални истраги во Македонија, рече Бучковски, не може да претпостави.

Филипче: Една година предупредувавме за сомнежите поврзани со Алта банка и нејзината поврзаност со Вучиќ