„Не е време за театар ниту задкулисни игри, туку е потребно делување. Затоа претседателот Мицкоски го афирмира барањето за средба со Ковачевски и неговиот тим за надминување на последиците од енергетската и економска криза“, посочија од опозициската ВМРО-ДПМНЕ, додавајќи оти не не време за суета на политичарите од власта
Претходно денеска, лидерот на ВМРО-ДПМНЕ кажа дека смета оти нема потреба да се состане со Економскиот совет на Владата и таму да го презентира својот концепт за справување со енергетската криза откако викендов и премиерот Димитар Ковачевски и вицепремиерот за економски прашања Фатмир Битиќи го повикаа да дојде на седницата на советот закажана за в среда наместо да одат на телевизиски дуел или во седиштето на партијата, како што бараше тој
Не е време за театар ниту за задкулисни игри, потребно е делување, велат од ВМРО-ДПМНЕ, посочувајќи оти лидерот на партијата Христијан Мицкоски го афирмира барањето за средба со премиерот Димитар Ковачевски и неговиот тим со цел надминување на последиците од економската и енергетската криза во земјава.
„Ниту една суета, а најмалку таа на Ковачевски е поважна од иднината и благосостојбата на граѓаните во овие сериозни времиња. Не е време за театар ниту задкулисни игри, туку е потребно делување. Затоа претседателот Мицкоски го афирмира барањето за средба со Ковачевски и неговиот тим за надминување на последиците од енергетската и економска криза“,
посочуваат од ВМРО-ДПМНЕ.
Суетата на политичарите од власта, додаваат оттаму, не е поважна од судбината на граѓаните.
Претходно денеска, лидерот на ВМРО-ДПМНЕ, Христијан Мицкоски кажа дека смета оти нема потреба да се состане со Економскиот совет на Владата и таму да го презентира својот концепт за справување со енергетската криза, откако викендов и премиерот Димитар Ковачевски и вицепремиерот за економски прашања Фатмир Битиќи го повикаа да дојде на седницата на советот закажана за в среда наместо да одат на телевизиски дуел или во седиштето на партијата, како што бараше тој.
Мицкоски во гостување во емисијата „Студио 10“ на ТВ 24 денеска кажа дека тој Економскиот совет бил составен од истите луѓе што ја решавале ковид-кризата и кои, како што потенцира, ништо не решиле.
„Јас уште на 29 септември побарав прием кај премиерот Димитар Ковачевски, денеска сме 3 октомври, пет дена потоа, од Димитар Ковачевски се уште не добив одговор, ме кани Битиќи на тело кое досега ништо успешно не решило, зошто тоа би го решило ова успешно?“,
кажа Мицкоски.
Изминатите неколку дена лидерот на најголемата опозициска партија го повикува премиерот Ковачевски на телевизиски дуел, а викендов го покани вицепремиерот за економски прашања Фатмир Битиќи да дојде во седиштето на партијата и таму да му го објасни неговиот концепт за справување со енергетската криза.
И Ковачевски и Битиќи ги одбија поканите на Мицкоски и го повикаа да дојде на следниот Економски совет на Владата закажан за в среда.
Лидерот на опозициската партија вчера преку објава на Фејсбук изрази жалење што премиерот и министрите во Владата не ги прифатиле неговите повици за телевизиска дебата и за средба на која тој ќе им го претстави својот концепт за справување со енергетската криза и повторно ја повика Владата, доколку сака да покаже „дека не се точни информациите за големи провизии од увозот на мазут, транспортот преку инстант компании на јаглен и се уште нејасната конструкција за гасот и затоплување на граѓаните“, со нејзин тим да дојде во седиштето на ВМРО-ДПМНЕ.
Мицкоски на Владата и нуди концепт со кој државата ќе заштеди 300 милиони евра. Претседателот на ВМРО-ДПМНЕ вели дека имале контакти со компании од Германија , Швајцарија и Чешка, а кои можат од „Газпром“ да донесат количина на гас која што ќе биде доволна за земјава.