Лидерот на ВМРО-ДПМНЕ предупреди дека доколку Владата не реагира на оваа понуда во наредните денови, потоа би можело да биде доцна, особено за индустриските капацитети кои набавуваат струја на слободниот пазар
Заштеда од 300 милиони евра е предогот кој ВМРО-ДПМНЕ и го нуди на Владата за намалување на енергетската криза и трошоците за производство на струја и топлинска енергија.
Според лидерот на ВМРО-ДПМНЕ Христијан Мицкоски, кој својот предлог го образложи на брифинг со новинарите, таа заштеда можат да ја обезбедат преку набавка на мазут за електраната ТЕЦ Неготино и тоа по цена која би била за 200 евра по тон пониска од таа која во моментов се набавува.
„ВМРО-ДПМНЕ обезбеди индицирани понуди за набавка на 200 000 тони за ТЕЦ Неготино и 250 милиони кубни метри гас за гасната централа ТЕ-ТО, со кои значително ќе се ублажи енергетската криза во Македонија и ќе се заштедат најмалку 300 милиони евра“,
рече Мицкоски.
Тој додаде дека имаат контакти со компании од Германија, Швајцарија и Чешка, а кои можат од Гаспром да донесат количина на гас која што е доволна, односно некаде околу 250 милиони кубни метри гас кои се потребни за да работи ТЕ-ТО во наредните шест месеци, да ги замени количините на електрична енергија од ТЕЦ Неготино, доколку ги користи македонското стопанство, а како нуспроизвод од тој процес е топлината која ќе ги задоволи половина од потребите на институциите и домовите во Скопје за централно затоплување. Другата половина се обезбедува преку топланите кои се сопственост на БЕГ, додаде Мицкоски.
„Вчера го слушнав Ковачевски дека преговараат да склучат договор со сопственикот на топланите, но претходно на состанокот со Сојузот на стопански комори беше сопственикот на тие топлани и кажа нешто сосема спротивно. Рече дека платил осум или девет милиони евра и се уште после година и пол не може да ги земе топланите во владение од стечајниот управник. Навистина не знам со кого преговараат“,
рече лидерот на опозицијата.
Мицкоски предупреди дека доколку Владата не реагира на оваа понуда во наредните денови, потоа би можело да биде доцна, особено за индустриските капацитети кои набавуваат струја на слободниот пазар.
„Од понеделник влегуваме во потензичен период кога се ближиме кон најскапиот месец во годината, каде цените ќе бидат многу поскапи од оние што се сега. Ако не се реагира најбрзо, имајќи ја предвид ситуацијата со Северен тек и тоа дека сите држави од Европа сега се буткаат на Јужен тек, после може да биде доцна. Нема друг начин како да се донесе и нема количини друг гас. Ако не се делува брзо ќе биде голем проблем“,
нагласи Мицкоски.
Тој информираше и дека поради големите сметки за струја голомите производствени капацитети во земјава се пред затворање, а информираше дека ФЕНИ откако пред неколку дена ги ставило печките на енергетски минимум, сега целосно ќе ја исклучи, дека рудникот Бучим Радовиш на 1 септември го запрело производството, во Макстил работи само валавницата, а најави и дека до крајот на годината би можеле да работат Злетово и Тораница. Според него со тоа Македонија останува без извоз од неколку милијарди и 600 милиони евра помалку во БДП.
На брифингот Мицкоски нагласи и дека за планот кој и го предлага на владата за набавка на поевтини енергенси, веќе разговарал со сите стопански комори во земјава и оти од нив добил согласност за планот.