Поранешниот шеф на УБК, Сашо Мијалков, сепак излегува од притвор. Апелацискиот суд во Скопје, како што потврдија оттаму за „360 степени“, ја прифатил жалбата на одбраната за притворот кој му беше определен во случајот „Плацови на Водно“.
Решението од второстепениот суд е испратено до Основниот кривичен суд од каде се очекува истото да биде доставено и до затворот „Скопје“ во Шуто Оризари каде тој ја издржува мерката притвор.
За Мијалков во моментов има активна гаранција од 11 106 501 евро. Таа беше понудена како гаранција дека нема да избега заедно со жалбата што неговите адвокати ја поднесоа за притворот кој тој претходно го имаше во случајот „Трезор“ каде тој првостепено е осуден на осум години затвор.
Апелација ја прифати гаранцијата и го укина притворот минатата среда, но ексшефот на УБК не излезе од Шутка затоа што Обвинителството за гонење организиран криминал и корупција истиот ден побара друг за притвор, но за случајот „Плацови на Водно“ каде тој е еден од обвинетите, којшто притвор беше одобрен од Кривичниот совет во Основниот кривичен суд.
На ваквата одлука, одбраната поднесе жалба до Апелација повикувајќи се на веќе правосилното решение за укинување на притворот со гаранцијата од 11,1 милиони евра. Апелација денеска одлучи да ја прифати жалбата и да го укине и овој притвор.
Покрај во „Трезор“, Мијалков е неправосилно осуден и во „Таргет-Тврдина“ на 12 години затвор. Освен во „Плацови на Водно“ обвинет е и во случајот „Титаник 2“, а осомничен во предметот „Империја“. Во „Тортура“, пак, доби ослободителна пресуда.
Мијалков и претходно во неколку наврати се обидуваше да излезе од притвор нудејќи гаранции. Меѓу последните што ги понуди пролетта 2021 година беше онаа во висина од 10,8 милиони евра. Тогаш обвинителот Артан Ајро од Обвинителството за гонење организиран криминал и корупција се согласи тој да излезе од притвор, меѓутоа кривичниот совет во Основниот кривичен суд одби бидејќи сметаше дека постои опасност од бегство.
Во објаснувањето тогаш од судот ги наведоа предметите во кои тој се гони, но и тоа што беше повеќе од 24 часа недостапен кога пред изрекувањето на пресудата за „Таргет-Тврдина“ му беше определена мерка куќен притвор.
На ова следуваше жалба на Мијалков до Апелација, но тогаш (јуни 2021) Аплеација за разлика од минатата недела, ја одби жалбата и гаранцијата од 10,8 милиони евра и одлучи тој да остане во притвор.
Сашо Мијалков издржува мерка притвор во затворот во Шуто Оризари од 26 февруари годинава, откако претходно неколку дена беше во куќен притвор.
Имено, во пресрет на изрекувањето на пресудата за „Таргет-Тврдина“, обвинителството на 21 февруари 2021 побара куќен притвор поради опасноста од бегство. Тогаш Мијалков повеќе од 24 часа не беше достапен. Надлежните распишаа дури и меѓународна потерница, а членови на семејството и обезбедувањето на Мијалков беа повикувани во полициска станица за да се добијат сознанија за евентуалното бегство. На 23 февруари тој сам се пријави во Обвинителството за гонење организиран криминал и корупција од каде што беше однесен во куќен притвор. Тој дури и даде изјава во јавноста со објаснување дека имал многу висока температура, се изолирал и не знаел дека го бараат.
Во периодот од 23 до 26 февруари 2021, кога беше изречена пресудата, тој остана во куќен притвор. На објавувањето на првостепената пресуда, со која доби 12 години затвор, обвинителката Ленче Ристоска побара ефективен наместо куќен притвор, што беше прифатено од судот и тој беше пренесен во затворот во Шуто Оризари.
По изрекувањето на првостепената пресуда за „Трезор“ на 13 април 2021 година, притвор му беше определен во овој наместо во предметот „Таргет-Тврдина“. Притворот во „Трезор“ тој го издржуваше притвор сè до минатата среда (22 декември 2021), кога тој му беше укинат со гаранцијата од 11,1 милиони евра. Изминатите седум дена, пак, остана во Шутка поради притворот во „Плацови на Водно“, кој денеска е укинат.
Сашо Мијалков / Фото: МИА