Денешната пресуда е трета по ред за Мијалков од предметите кои ги започна СЈО, а потоа ги преземаа редовните обвинителства, но е прва ослободителна. Во случајот „Таргет-Тврдина“ на 26 февруари годинава тој неправосилно беше осуден на 12 години затвор, а на 13 април во „Трезор“ доби 8 години, пресуда која исто така, сè уште не е правосилна
Судијката во денешното образложение пред изрекувањето рече дека иако претходно се преотворила главната расправа за предметот, обвинителот останал на истото обвинение и не го допрецизирал. На сличен начин, како кога го врати предметот, објасни дека не е јасно кој од обвинетите „алфи“ што преземал и каков придонес имал кон кривичното дело, како и тоа што обвинителот не направил градација на односот на поттикнувачот – Мијалков со другите обвинети поради што може да се извлече само заклучок дека ексдиректорот на УБК подеднакво ги поттикнувал сите
Судечкиот совет на чело со судијката Александра Ристеска изрече ослободителна пресуда во предметот „Тортура“ за ексдиректорот на УБК, Сашо Мијалков, поранешниот командант на полициската единица „Алфа“, Ивица Анчевски – Пуки и петмината „алфи“: Новица Станковски, Петар Милошевски, Филип Атанасов, Јован Боцевски и Метуш Шабани.
Судијката рече дека обвинителот Љубомир Лапе не докажал надвор од основано сомнение дека тие се виновни за делот мачење и друго сурово, нечовечко или понижувачко постапување и казнување. Случајот се однесуваше на начинот на кој беше уапсен лидерот на Обединети за Македонија, Љубе Бошкоски на 6 јуни 2011 година, ден по тогашните парламентарни избори.
Денешното изрекување на пресудата следува откако пред околу еден месец предметот еднаш се најде пред нејзино изрекување. Но, тогаш судијката Александра Ристеска соопшти дека судечкиот совет одлучил да се преотвори главната расправа односно процесот да се врати во дополнение на доказната постапка бидејќи за судот не било јасно кој од обвинетите кои дејствија ги презел и со колкав интензитет.
„Од сите изведени докази на главната расправа за судот неспорно е дека се случил одреден настан, но во целост не е јасно кој од обвинетите кое дејствие на извршување го презел или каков е тој битен придонес кон извршување на делото имајќи ја предвид правната квалификација на законското битие на кривичното дело кое им се става на товар на обвинетите како соизвршители. Ова дотолку повеќе што обвинението е конципирано на начин што дава еднаква правна квалификација за сите сообвинети така што ги товари дека сите презеле исти дејствија на извршување, па за судот остана нејасно кој од обвинетите кое дејствие и со колкав интензитет и обем го презема. Исто така, нејасен е каузалитетот меѓу преземените дејствија и настаната последица односно кое дејствие е каузално кон извршување на кривичното дело и настапување на последиците“,
рече Ристеска на рочиштето на 17 јуни.
Судијката во денешното образложение пред изрекувањето рече дека иако претходно се преотворила главната расправа за предметот, обвинителот останал на истото обвинение и не го допрецизирал. На сличен начин објасни дека не е јасно кој од обвинетите „алфи“ што преземал и каков придонес имал кон кривичното дело, како и тоа што обвинителот не направил градација на односот на поттикнувачот – Мијалков со другите обвинети поради што може да се извлече само заклучок дека ексдиректорот на УБК подеднакво ги поттикнувал сите.
Самото обвинение во делот на поттикнувањето, рече Ристеска, за судот останал само на ниво на претпоставката врз која била изградена теоријата на случај на обвинителството, меѓутоа правната сигурност, додаде таа, во ниту еден случај не дозволува недокажани претпоставки.
За последиците кои му биле нанесени на Бошкоски од чинот на апсење, според судот, од приложеното вештачење се констатира само општа состојба на душевно страдање. Исто така, судијката го нагласи и тоа што на денот на апсењето лидерот на Обединети за Македонија, иако имал бранител во полициската станица, немал никакви забелешки за постапувањето на полициските службеници.
За потсетување, откако претходно предметот повторно беше отворен, обвинителот Љубомир Лапе, не предложи нови докази зошто рече дека смета оти сите важни факти се целосно утврдени и фактичката состојба е целосна јасна. Тој рече дека сите обвинети „алфи“ презеле дејствија и употребиле сила за непотребно да го легнат Бошкоски наземи додека камерите снимаат и оти заеднички го сториле кривичното дело – мачење и друго сурово, нечовечко или понижувачко постапување и казнување. Од видеоснимката јасно се гледа, порача обвинителот, кој што направил.
„Не постои наука или научна дисциплина која може со примена на научни методи да измери кој обвинет поединечно колку точно физичка сила употребил додека го легнувал лицето на земја“,
рече Лапе во дел од неговото обраќање пред судот на 8 јули.
Одбрана, пак, тогаш реагираше што обвинителот наместо да предложи докази или да го прецизира обвинението, тој давал свое излагање.
„Иако денеска главната расправа беше закажана за доставување докази, не слушнавме ниту еден нов доказ, ниту нешто ново на однос на околностите кои се релевантни за овој предмет. Фактички слушнавме само мислење од страна на обвинителот кој дефакто остана на обвинението и на истите тврдења кои ги има од почетокот на постапката“,
рече адвокатот Петар Василев.
Трета пресуда за Мијалков
Денешната пресуда е трета по ред за Мијалков од предметите кои ги започна СЈО, а потоа ги преземаа редовните обвинителства. Во случајот „Таргет-Тврдина“ на 26 февруари за масовното прислушување тој доби 12 години затвор, а на 13 април во „Трезор“, кој се однесува на уништувањето на опремата за следење на комуникациите во УБК, му беше изречена затворска казна од 8 години. Двете пресуди сè уште не се правосилни, односно за жалбите на странките треба да се изјасни и Апелацискиот суд во Скопје.
Мијалков, заедно со Мендух Тачи и тројца поранешни членови на ДИК, е обвинет и во случајот „Титаник 2“, каде што во 2019 година од Основниот кривичен суд – Скопје беше осуден на 3 години затвор, но пресудата беше укината од Апелација и случајот се врати на повторно судење во првостепениот суд. Овој случај се однесува на договарање за гласање во ДИК во врска со приговор на ВМРО-ДПМНЕ за локалните избори 2013 година.
Ексдиректорот на УБК седи на обвинителна клупа и во случајот „Плацови за Водно“, за кој судењето започна минатата недела. Тој е осомичен и во финансиската истрага „Империја“.