Обвинителот Љубомир Лапе во предметот „Тортура“ за апсењето на Љубе Бошковски во 2011 смета дека сите важни факти се целосно утврдени и фактичката состојба е целосна јасна, па затоа не предлага нови докази или повторно изведување на оние што веќе беа изведени во текот на судењето.
Тој ваквиот став го посочи на денешното рочиште во Основниот кривичен суд откако на минатото судијката Александар Ристеска, наместо да донесе пресуда, одлучи случајот повторно да се врати во дополнение на доказната постапка бидејќи за судот не било јасно кој од обвинетите кои дејствија ги презел и со колкав интензитет.
Во „Тортура“ обвинети се ексдиректорот на УБК, Сашо Мијалков и шестмина припадници на поранешната полициска единица „Алфа“, а спорниот начин на апсење на лидерот на Обединети за Македонија се случи на 6 јуни 2011 – ден по тогашните парламентарни избори.
„Не постои наука која ќе измери кој од ‘алфите’ колкава сила употребил“
Лапе во своето објаснување денеска наведе дека сите обвинети „алфи“ презеле дејствија и употребиле сила за непотребно да го легнат Бошкоски наземи додека камерите снимаат и оти заеднички го сториле кривичното дело – мачење и друго сурово, нечовечко или понижувачко постапување и казнување. Јасно се гледа, според него, од видеоснимката којшто направил и со колкав интензитет, а за тоа, нагласи, сведочеле и тројца сведоци. А кој колку сила од нив употребил, рече обвинителот, не може ниту една наука да го докаже.
„Не постои наука или научна дисциплина која може со примена на научни методи да измери кој обвинет поединечно колку точно физичка сила употребил додека го легнувал лицето на земја“,
рече Лапе.
Тој се повика и на праксата на Европскиот суд за човекови права за кој и само снимката од тортурата е доказ, како и дека ЕСЧП прави разлика дали има тортура (мачење) или друго сурово, нечовечко и понижувачко постапување врз основа на тежината на страдањето на жртвата.
„Употребената сила и закана сама по себе не е особено правно релевантна туку е важно дали е постигнат ефектот врз жртвата, облици и техники на мачење или нечовечки третман има многу од кои голем дел воопшто и не опфаќаат употреба на сила. На пример, кинеска тортура на лице да му се пушта капка по капка да му паѓа на главата; ставање со превез или вреќа на главата, непотребно држење накосен на ѕид во стресна положба или подложност на силни звуци. Сите овие се техники на нехуман и деградирачки третман кои опфаќаат минимална или никаква употреба на сила, а последицата или ефектот врз жртвата сепак настанува односно се предизвикува чувство на страв, неизвесност, омаловажување или инфериорност. Во конкретниот случај е предизвикано душевно страдање што е битно обележје на кривичното дело“,
рече обвинителот.
„Наместо докази или нешто ново, слушнавме само мислење на обвинителот“
Одбрана, пак, реагираше што обвинителот наместо да предложи докази или да го прецизира обвинението, тој имал свое излагање.
„Иако денеска главната расправа беше закажана за доставување докази, не слушнавме ниту еден нов доказ, ниту нешто ново на однос на околностите кои се релевантни за овој предмет. Фактички слушнавме само мислење од страна на обвинителот кој дефакто остана на обвинението и на истите тврдења кои ги има од почетокот на постапката“,
рече адвокатот Петар Василев.
Тој му возврати и на обвинителот затоа што се повикуваше на праксата на Европскиот суд, нагласувајќи дека во Стразбур се разгледуваат предмети во кои се искористени сите можности кои ги нуди домашното законодавство, а во случајот со Бошкоски воопшто ниту трага од каков било приговор на чинот на апсење.
Адвокатите на Мијалков и останатите обвинети побараа да добијат записник и на следното рочиште наредната недела да се произнесат за денешното излагање на обвинителот. Доколку и тие немаат некакви докази и предлози, судијката Ристеска најави дека ќе закаже рочиште за нови завршни зборови.