Наместо пресуда за ексдиректорот на УБК, Сашо Мијалков и шестмина припадници на поранешната полициска единица „Алфа“ во предметот „Тортура“, судијката Александра Ристеска одлучи дека главната расправа треба да се преотвори.
Предметот се однесува на начинот на апсење на лидерот на Обединети за Македонија, Љубе Бошкоски, еден ден по парламентарните избори во 2011 година. Заедно со поротниците, судијката рече дека едногласно одлучиле да донесат ваква одлука бидејќи за судот е неспорно дека се случил настанот, но во целост не е јасно кој од обвинетите кои дејствија ги презел и со колкав интензитет.
„Од сите изведени докази на главната расправа за судот неспорно е дека се случил одреден настан, но во целост не е јасно кој од обвинетите кое дејствие на извршување го презел или каков е тој битен придонес кон извршување на делото имајќи ја предвид правната квалификација на законското битие на кривичното дело кое им се става на товар на обвинетите како соизвршители. Ова дотолку повеќе што обвинението е конципирано на начин што дава еднаква правна квалификација за сите сообвинети така што ги товари дека сите презеле исти дејствија на извршување, па за судот остана нејасно кој од обвинетите кое дејствие и со колкав интензитет и обем го презема. Исто така, нејасен е каузалитетот меѓу преземените дејствија и настаната последица односно кое дејствие е каузално кон извршување на кривичното дело и настапување на последицицата“,
рече Ристеска.
Судијката рече дека во моментов постои фактичка пречка за донесување на мериторна одлука од страна и затоа одлучиле главната расправа да се преотвори и да се разјаснат фактичките прашања. Со тоа, таа закажа следни рочишта за 8 и 14 јули.
Одлуката повторно да се отвори главната расправа, како што рече Ристеска, е донесена согласно ставот 1 од членот 397 во Законот за кривична постапка (ЗКП) кој предвидува дека пресуда се изрекува доколку судот не гледа причина повторно да се отвори главната расправа за да дополни постапката или да се разјаснат одделни прашања.
„Ако судот во текот на советувањето не најде дека треба повторно да се отвори главна расправа заради дополнување на постапката или разјаснување на одделни прашања, ќе изрече пресуда“,
гласи ставот 1 од членот 397 во ЗКП.
Денешната пресуда требаше да биде трета по ред за Мијалков оваа година. Во случајот „Таргет-Тврдина“ на 26 февруари за масовното прислушување тој доби 12 години затвор, а на 13 април во „Трезор“, кој се однесува на уништувањето на опремата за следење на комуникациите во УБК, му беше изречена затворска казна од 8 години. Двете пресуди сè уште не се правосилни, односно за жалбите на странките треба да се изјасни и Апелацискиот суд во Скопје.
Мијалков, заедно со Мендух Тачи и тројца поранешни членови на ДИК, е обвинет и во случајот „Титаник 2“, каде што во 2019 година од Основниот кривичен суд – Скопје беше осуден на 3 години затвор, но пресудата беше укината од Апелација и случајот се врати на повторно судење во првостепениот суд. Овој случај се однесува на договарање за гласање во ДИК во врска со приговор на ВМРО-ДПМНЕ за локалните избори 2013 година.
Ексдиректорот на УБК е осомничен и во двете финансиски истраги „Империја“ и „Плацови на Водно“ од кои за втората Обвинителството за гонење организиран криминал и корупција неодамна поднесе обвинение, кое чека за оценка во Кривичен.
„Тортура“: Што тврдеше обвинителството, а како се бранеа обвинетите?
Истрагата за овој предмет ја отвори СЈО, а со неговото згаснување, како и останатите случаи, и „Тортура“ заврши во рацете на редовните обвинителства. Обвинителот од поранешното СЈО, Љубомир Лапе остана надлежен да постапува, а во завршните зборови побара затворски казни. Според обвинителството, при апсењето на Бошкоски имало мачење. Тој не давал отпор, а била употребена полициска сила, бил легнат на земја во близина на полски тоалет кај ресторанот „Воденица“ во Скопје, бил враќан за да го снимаат телевизиските камери со цел јавно да го омаловажат, а сето тоа предизвикало психичко страдање. Мотивот, рече Лапе во завршните зборови, бил политички реваншизам.
- Обвинителот во завршните зборови за „Тортура“: „Алфите“ навеле сè и сешто, но не и дека го легнале Љубе Бошкоски наземи
- „Тортура“: Обвинителот Лапе побара затворски казни за Мијалков и „алфите“
Од друга страна, одбраната тврдеше дека цело обвинение се заснова на претпоставки и оти лидерот на Обединети за Македонија со своето однесување односно давање отпор ја предизвикал нивната интервенција, но тврдеше и дека обвинетите не ги пречекориле полициските овластувања. Исто така, адвокатите и обвинетите ги отфрлаа и наводите дека биле поттикнати од Мијалков со кого, тврдеа, немале ниту телефонски ниту каков било контакт.