Припадник на полициската единица „Алфа“, кој во 2011 година учествувал во апсењето на Љубе Бошкоски, Петар Милошевски, обвинет во предметот „Тортура“, денеска во Основниот кривичен суд даваше одбрана тврдејќи дека при приведувањето на лидерот на Обединети за Македонија не биле пречекорени полициските овластувања.
Обвинетиот тогаш бил водач на екипа од 3-4 полицајци од „алфите“ и сведочеше дека дента на 6 јуни 2011 година, еден ден по парламентарните избори, додека биле на смена, биле повикани од претпоставениот раководител на смена зад Министерството за економија во Капиштец.
Се собрале и други припадници на единицата и им било кажано дека ќе се одвива акција за апсење лице кое најверојатно ќе има вооружено обезбедување. Според сведочењето на Милошевски, им било напоменато дека најверојатно станува збор за дилери на дрога и дека треба да бидат многу внимателни. Потоа, сведочеше дека од локацијата кај Министерството, заедно со неговиот тим од уште тројца колеги, се упатиле кон ресторанот „Воденица“ каде што бил командантот на „алфите“, Ивица Анчевски-Пуки, со уште еден колега.
„Го забележав Љубе Бошкоски како влезе во ресторанот, само го приметив визуелно и не обратив внимание на него. Понатаму, знам дека Ивица Анчевски зборуваше на телефон со некого и во еден момент кажа ’брзо, ова лице треба да се апси‘ и покажа со прст. Јас бев свртен со грб, кога се свртев видов дека се работи за Бошкоски, кој носеше некаква кеса во раката. Веднаш се упатив кон него и извадив службена легитимација. Љубе Бошкоски застана, се сврте кон мене, ме погледна и кога очекував да извади лична карта за да се легитимира, тој се сврте кон паркингот и со трчање се упати кон возило кое беше таму. Тој ни ја предизвика нашата интервенција бидејќи доколку застанеше и се легитимираше немаше да се случи никаква употреба на физичка сила ниту, пак, средства за присилба“,
рече обвинетиот во својот исказ и тврдеше дека Бошкоски им се обраќал со погрдни зборови додека трчал.
Тој тврдеше дека Бошкоски давал отпор, мавтал со раце и нозе, а тие дури и не ги употребиле стандардните процедури за веднаш во расчекор да го соборат наземи, токму поради тоа што станувало збор за поранешен министер за внатрешни работи.
„Бидејќи даваше отпор додека беше на возилото и не можевме да го прилепиме со телото, го свртивме и го легнавме на земја, со тоа што внимававме на секој детаљ, да не предизвикаме никаква физичка повреда. Кога го легнавме, ми текнува на еден детаљ, му ја фатив главата за да не се повреди бидејќи беше асфалт. Кога го легнавме, му направив полуга на раката по што му ставив лисици на рацете“,
тврдеше сведокот и додаде дека неговиот колега што му асистирал држел пиштол, но никогаш не го вперил во Бошкоски, како што тврди обвинителството.
Потоа, раскажуваше, раководителот на смена го кренал Бошкоски од земја, а колегите го доближиле до полскиот тоалет и до една приколка. Тој тврди дека бил однесен до полскиот тоалет со оглед дека претходно се обидел да избега и целта била да има физичка препрека. На прашање на обвинителот Љубомир Лапе, дали и возилото не е физичка препрека, обвинетиот одговори дека не го ставиле до возилото бидејќи тоа било предмет на работа. Понатаму, тој раскажуваше и како го однеле во полициска станица во Гази Баба каде што дури и разговарале со Бошкоски, кој, според обвинетиот, не се пожалил на полициското постапување ниту имал некакви повреди.
Испитувањето на овој обвинет продолжува во текот на денешното рочиште, додека претходно веќе сведочеше и обвинетиот тогашен началник на единицата „Алфа“, Ивица Анчевски-Пуки.
Обвинетите и на наредното рочиште ќе даваат своја одбрана. Досега одбрана сè уште нема дадено Сашо Мијалков, кој е првообвинет во предметот. Тој на денешното рочиште беше спроведен од затворот „Скопје“ во Шуто Оризари, а во судница, покрај новинарите, како јавност е присутно и неговото семејство, сопругата и двата сина, како и поранешниот градоначалник на Аеродром, Ивица Коневски.
Во предметот вкупно се обвинети седум лица (Мијалков и шестмина тогашни припадници на единицата „Алфа“). Сите се товарат за делото мачење и друго сурово, нечовечко или понижувачко постапување и казнување.
Според обвинението, Мијалков ги навел другите да предизвикаат душевно страдање кај лидерот на Обединети за Македонија, а „алфите“, пак, без приговор и со сервилна покорност кон тогашниот шеф на УБК, постапиле. Кога беше отворена истрагата, обвинителството тврдеше дека начинот на кој бил апсен Бошковски бил понижувачки, му биле изрекувани пцости, погрдни зборови, закани итн.
Тогашното СЈО, презентирајќи ја истрагата, тврдеше дека лидерот на Обединети за Македонија намерно бил апсен на начинот како што можеше да види јавноста преку објавуваните снимки во медиумите, како на пример, тоа што беше држен со лицето кон полски тоалет за да го снимаат медиумите, а со тоа му биле повредени достоинството и личноста.
За тоа во 2015 година тогашната опозициска партија СДСМ објавуваше „бомби“ помеѓу Мијалков со тогашните уредник на Сител ТВ, Драган Павловиќ-Латас, и со сопственикот на Канал 5, Емил Стојменов, за апсењето на Бошкоски и за тоа како да се пласира тоа во медиумите.