Ја следам внимателно реакцијата на професионалната јавност дека не секогаш висината на казната е најдобриот механизам за изрекување мерки и повторно доаѓаме до тоа дека правосудниот систем, обвинителите и судиите треба независно и непристрасно да си ја вршат својата работа. Некогаш, за жал, имам впечаток дека обвинителите и судиите се ставаат во улога поголема од политичарите, дека прават политичка проценка пред да донесат одредена одлука, за тајмингот на одлуката, за висината на казната, вели Грковска
Вицепремиерката задолжена за политики за добро владеење Славица Грковска е задоволна од членот во Кривичниот законик кој се однесува на проширената конфискација на имот, со што на судиите им се дава поголема можност да пресудуваат и да биде тоа една од сериозните мерки кога станува збор за борба против корупцијата и организираниот криминал.
Грковска денеска пред почетокот на јавната расправа за нацрт-стратегијата за транспарентност на Владата, прашана за коментар околу измените во Кривичниот законик, рече дека е задоволна од членот за проширената конфискација, но за другите одредби од Законот, како што рече, ја изразила својата резерва на седницата на Владата.
„Кога станува збор за измените во Кривичниот законик за членот што се однесува на проширената конфискација сакам да кажам дека сум задоволна затоа што ова е иницијатива на мојот кабинет. Ние како кабинет, бидејќи сме задолжени за координација на Стратегијата за зголемување на капацитетите за финансиски истраги и конфискација на имот, го дадовме тој предлог во јуни и го задолживме Министерството за правда да го даде тој предлог со оглед на тоа што проширената конфискација дава поголема можност на судиите да пресудуваат и да биде тоа една од сериозните мерки кога станува збор за борба против корупцијата и организираниот криминал. Според искуството што го земавме и од другите држави најголемиот притисок и најголемата реакција ќе ја почувствуваат тие што се прекришиле од законот доколку лично почувствуваат дека се засегнати од прекршувањето на законот и стекнувањето на имотна корист спротивно на законските одредби“,
рече Грковска.
Според неа, кога прекршителите ќе почувствуваат дека им се одзема имотот, тогаш реално ќе почувствуваат дека навистина губат нешто особено кога, како што рече Грковска, тој имот има можност да се врати назад кај граѓаните и тие да имаат бенефит од тие средства.
За другите одредби од Законот, Грковска рече дека ја изразила својата резерва на седницата на Владата поради тоа што, како што наведе, сведоци сте дека има реакции во јавноста за начинот на кој тие членови ќе се ефектуираат на актуелни случаи, меѓутоа и генерално.
„И повторно доаѓаме на прашањето на ефикасноста на правосудниот систем заради тоа што и со старите решенија ние се доведуваме во ситуација одредени случаи да застарат особено кога станува збор за политичари, бизнисмени кои биле или сè уште се блиски до власта. Знаете дека јас реагирав и минатата година, имавме неколку реакции, имавме неколку настани за тоа да најдеме начин како тоа да се превенира. Ја следам внимателно реакцијата на професионалната јавност дека не секогаш висината на казната е најдобриот механизам за изрекување на мерки и повторно доаѓаме до тоа дека правосудниот систем, обвинителите и судиите треба независно и непристрасно да си ја вршат својата работа. Некогаш за жал имам впечаток дека обвинителите и судиите се ставаат во улога поголема од политичарите, дека прават политичка проценка пред да донесат одредена одлука, за тајмингот на одлуката, за висината на казната“,
рече Грковска.
Таа додаде дека е недопустливо предмети да се чуваат во фиока по девет и повеќе месеци.
„Свесни сте дека има по девет и повеќе месеци чување на предмети во фиока, што е недопустливо, и се надевам дека ова ќе биде едно освестување за обвинителите и судиите дека треба со интегритет да си ја вршат работата, да не ги интересира за кого станува збор, да пресудуваат исклучиво врз основа на законските одредби“,
додаде Грковска.
Собранието минатата недела експресно ги донесе измените и дополнувањата на Кривичниот законик откако претходно Владата „тајно“ ги утврди.
Од Платформата на граѓански организации за борба против корупцијата и Блупринт-групата за реформи во правосудството имаше барања претседателот Стево Пендаровски да не става потпис на указот со кој официјално во сила ќе стапат измените од Кривичниот законик. Но, Пендаровски сепак одлучи да го потпише указот.
Со измените во Кривичниот законик усвоени во Собранието, не е предвидена амнестија за кривичните дела сторени во вршење на службата, туку напротив, како што се наведува во соопштението од кај Пендаровски, казни и понатаму се предвидени за сторителите на тие дела, со тоа што со овие измени акцентот е ставен и на т.н. проширена конфискација на имот.
Со измените на Кривичниот законик, со кои, меѓу другото, се предвидува намалување на казните во членот 353 кој се однесува на злоупотреба на службената положба и овластување, кој најчесто се користеше за гонење службени лица и функционери, како и намалување на казните за делото злосторничко здружување од членот 394, односно наместо сегашните кои предвидуваат од една до десет години затвор, на една до три години затвор. Намалувањето на казните повлекува и порано застарување на кривичните дела.
Во најмалку 14 судски процеси познати во јавноста, каде што на обвинителна клупа седат поранешни функционери, ќе настапи застареност на кривичните дела злосторничко здружување и злоупотреба на службената положба и овластувања. Речиси сите судски случаи се предмети кои ги отвори сега расформираното Специјално јавно обвинителство (СЈО), а во нив се опфатени над 80 лица.
Во дел од наведените предмети, „ТНТ“, „Талир“, „Талир 2“, „Таргет-Тврдина“, „Трезор“, „Тарифа“, „Дизајн“, „Топлик“, „Титаник“, „Тендери“, „Титаник 2“, „Траекторија“, „Шпански скали“, предметот за градоначалникот на Карпош, Стевчо Јакимовски, целосно ќе прекине кривичниот прогон, во дел, пак, постапките ќе продолжат за преостанатите кривични дела, но во случај на осудителна пресуда казните ќе бидат помали.