Поголема е бројката на опозиционери што поднеле барање за апанажа, со оглед на тоа што на листите на ВМРО-ДПМНЕ на овие избори се најдоа само неколкумина кандидати од претходниот состав
Повеќе од една третина од пратениците од претходниот состав кои не добија нов мандат ќе одат на апанажа.
Претседателот на парламентот Талат Џафери соопшти денеска дека 44 од неговите колеги од собранискиот состав 2016-2020 поднеле досега барање за апанажа, односно за надоместок во висина од пратеничката плата, во траење, главно, од една година, по завршувањето на пратеничкиот мандат.
Пратениците на кои им завршил мандатот имаат рок од 30 дена од престанокот на функцијата да изберат дали ќе одат на апанажа или ќе се вратат на старите работни места, каде што биле вработени пред да бидат избрани во Собранието. Со оглед на тоа што парламентот се конституираше на 4 август, рокот е веќе истечен.
Од 30 август, пак, почна да тече рокот од 30 дена во кој претходните министри, на кои им престана мандатот со изборот на новата влада, исто така, имаат право да поднесат до собраниската Комисија за избори и именувања барање за апанажа.
Во новиот кабинет на Зоран Заев не влегоа десетина министри од последната владина постава, односно од техничката влада. Меѓу нив се Рената Тренеска-Дескоска (која кажа дека се враќа на Правниот факултет), Арбер Адеми и Дамјан Манчевски (кои се избрани за пратеници), Нина Ангеловска, Садула Дураки, Горан Сугарески… како и сите досегашни министри без ресор.
Во однос на поранешните пратеници, според информациите, поголема е бројката на опозиционери кои поднеле барање за апанажа, со оглед на тоа што на листите на ВМРО-ДПМНЕ на овие избори се најдоа само неколкумина кандидати од претходниот состав.
Што се однесува, пак, до поранешните пратеници и министри на СДСМ и на ДУИ, кои моментно немаат политички ангажман, најавите се дека дел од нив ќе бидат ангажирани во вториот и во третиот ешалон на власта, односно на заменички, директорски и други раководни функции.
Исто така, Заев најави неодамна дека ќе им понуди функции во извршната власт и на дел од новоизбраните пратеници на СДСМ, така што следните кандидати од листите на „Можеме“, кои не беа избрани на 15 јули, сега ќе добијат шанса за влез во парламентот.