Премиерот Зоран Заев вели дека голем дел од поранешниот пратенички состав и ексфункционерите во неговата претходна влада ќе добијат понуди од него за ангажирање во државните институции. Со оглед дека тие имаат искуство и експертиза, на тој начин, според него, ќе може да продолжат да работат за државата, но и голем дел од нив нема да земаат апанажа.
„Голем процент од поранешниот пратенички состав ќе има понуда, од мене лично како премиер, да се вгради во државните институции. Не зборувам само за директорски места, зборувам за позиции кои ќе значат искористување на нивното драго искуство и капацитет, да може да влезат во самите институции да продолжат да креираат и создаваат за својата државата. Затоа што кога извршувале највисоки функции во државата редно е тие луѓе кои имале свои профили и експертизи да бидат и понатаму во функција на државата и следните месеци се месеци на донесување такви одлуки. Верувам дека повеќе од 50-60 проценти од овие апанажи веднаш ќе отпаднат затоа што им следуваат следни ангажмани“,
рече Заев.
Тој вели дека дали ќе се прават законски измени за укинување на апанажата е работа на парламентот, каде што се размислува на оваа тема. Но, и да се направи тоа, нема да важи ретроактивно за бившите функционери.
„Секако, парламентот размислува за оваа работа. Ова е работа на парламентот. Ние политичарите и претседателите на политичките партии, сега и како претседател на Владата, ќе дадам свои ставови по ова прашање“,
вели премиерот.