Од бугарското Министерство додаваат оти е забележана реакцијата на македонското МНР со која се осудува говорот на омраза за време на вчерашниот фудбалскиот натпревар меѓу Северна Македонија и Бугарија, но истовремено се повикува властите во Скопје да преземат, како што се вели, решителни чекори за искоренување на антибугарската агресија на јавниот простор на државата
Говорот на омраза против Бугарија и Бугарите од трибините на националниот стадион во Скопје e недвосмислено негирање на основните вредности на современите демократски општества и е во спротивност со европските принципи и норми на однесување.
Ова се наведува во реакцијата на бугарското Министерство за надворешни работи (МНР) од каде го осудија јавното свернавење на бугарската химна на фудбалскиот меч меѓу македонската и бугарската фудбалска репрезентација кој вчера се одржа на стадионот „Тодор Проески“ во Скопје.
Од Министерството додаваат оти е забележана реакцијата на македонското МНР со која се осудува говорот на омраза за време на фудбалскиот натпревар, но истовремено се повикува властите во Скопје да преземат, како што се вели, решителни чекори за искоренување на антибугарската агресија на јавниот простор на државата.
Со Договорот од 2017 година и билатералните протоколи потпишани во 2019 и 2022 година, потсетуваат оттаму, Бугарија и Северна Македонија категорично се залагаат за преземање ефективни мерки против говорот на омраза
„Одржувањето на напредокот постигнат во последните месеци во политичкиот дијалог бара ваквите настани засекогаш да станат дел од минатото. Само во тој дух двете земји ќе можат да отворат нова страница во односите, засновани на меѓусебно почитување и добрососедство“,
се додава во соопштението на бугарското МНР.
Претходно денеска и македонското Министерство за надворешни работи упати јавна реакција и осуда за вчерашниот израз на говорот на омраза што можеше да се забележи во текот на фудбалскиот натпревар меѓу репрезентациите на Северна Македонија и Бугарија.
„Спортските настани претставуваат највисокиот израз на принципите на фер однос, меѓусебна почит и натпревар во спортски дух. Злоупотребата на овие настани за ширење на омраза и нетрпеливост претставуваат суштинска спротивност на нивната основна замисла“,
се наведува во реакцијата од македонското МНР.
Реакции за исвиркувањето на бугарската химна стигнуваат и од лидерите на бугарските партии. Поранешниот премиер и претседател на ГЕРБ, Бојко Борисов, рече дека со ваквите постапки „соседите од Северна Македонија не покажуваат дека ги разбираат европските вредности“.
Лидерката на Бугарската социјалистичка партија (БСП), Корнелија Нинова, пак, порача дека тоа што се случило е срамно и неприфатливо и оти со скандирањето и исвиркувањето луѓето во Северна Македонија покажале дека не се созреани да бидат Европејци.
Вчерашниот натпревар помеѓу двете репрезентации беше во рамки на последното коло од групата Ц од Лигата на нации и се играше на Националната арена „Тодор Проески“ во Скопје. Мечот заврши со победа на Бугарија од 1:0.