Екстрадиран 19-годишниот Саит Саитов кој прегази жена во скопски Капиштец и побегна од државата

Од МВР соопштија дека на 19-годишникот му е определена мерка притвор и дека е предаден во затворот „Скопје“ на понатамошна постапка

Од Србија во земјава денеска е екстрадиран 19-годишниот Саит Саитов од Скопје, кој на почетокот на јануари годинава со автомобил прегази повозрасна жена во скопски Капиштец и побегна надвор од државата – соопштија попладнево од Министерството за внатрешни работи (МВР).

Од МВР додаваат дека на 19-годишникот му е определена мерка притвор и дека е предаден во затворот „Скопје“ на понатамошна постапка.

„Саитов беше баран со меѓународна потерница поради основано сомнение за сторени кривични дела против безбедноста на луѓето и имотот во сообраќајот, како и неукажување помош на лице повредено во сообраќајна незгода за кривичноправен настан што се случил во Скопје на 9.1.2026 година“,

соопштија од Министерството.

Сообраќајката за која е обвинет Саитов се случи на 9 јануари во скопската населба Капиштец, кога тој со автомобил „фолксваген пасат“, сопственост на неговиот татко, удри во 79-годишната Љуба Јаковлеска и побегна од местото на несреќата. Жената кратко време по настанот им подлегна на повредите, а момчето заедно со својот татко, со помош на уште две лица, уште истиот ден ја напуштија државата.

• Возел во спротивна лента, со неприспособена брзина и без возачка – се бара притвор за 18-годишниот возач кој усмрти жена во Скопје и побегна

• Јавното обвинителство поднесе обвинение против две лица за помагање на осомничен по сообраќајна несреќа

Неколку дена по настанот, МВР распиша меѓународна потерница по Саитов, а во февруари годинава тој беше уапсен во Белград, каде што му беше одреден екстрадициски притвор.

• Во Белград е уапсен Саит Саитов кој прегази 79-годишна жена во Скопје и избега од местото, а потоа и од државата