Неговиот вечерашен јавен настап во кој се бранеше од наводите во документарниот филм „Нечиста крв“ на ИРЛ е во пресрет на утрешниот брифинг со новинарите во скопското обвинителство каде се води истрага во која Митрев е осомничен за измама на пациенти
Докторот Жан Митрев, сопственик на истоимената приватна клиника во Скопје, вели дека не се плаши од обвинение за измама во врска со лекувањето ковид-пациенти со методот на хемофилтрација и не планира да се спогодува со обвинителството.
„Не се плашам од обвинение. Нема измама. Ќе се докажуваме, ако треба 100 години ќе се докажувам пред суд бидејќи нема такво нешто“,
рече Митрев во гостувањето во емисијата „Топ тема“ на Телма ТВ.
Митрев во телевизиското гостување тврдеше дека никогаш не ги лажел пациентите и нивните семејства и оти на никој не му кажал дека хемофилтрацијата е лек за корона.
„Никогаш не сум рекол дека тоа е нешто што лекува корона, туку дека тоа е можно да им помогнеме на некои пациенти“,
тврдеше докторот.
Хемофилтрацијата, зборуваше тој, не е ништо ново и секоја интензивна нега на кардиохирургија е „фамилијарна“ со оваа метода на лекување, а во неговата клиника се користела од самото основање.
„Овој начин на хемофилтрација, како најсофистициран, е од 2008 година, а од 2013 година е и „Огзирис“ хемофилтерот, како посебен софистициран филтер кој, покрај другите токсини во организмот, вади и делови од бактерии, вади некои имунолошки активности, т.е. хиперактивности кои дополнително може да му наштетат на организмот“,
рече Митрев.
Неговото вечерашно интервју е во пресрет на утрешниот брифинг со новинарите што го организира шефот на Основното јавно обвинителство (ОЈО) Скопје, Гаврил Бубевски, и обвинителката Искра Хаџи Василева која ја води истрагата во која Митрев е осомничен за измама на пациенти, а која беше покрената по објавувањето на документарецот „Нечиста крв“ на Истражувачката репортерска лабораторија (ИРЛ).
Тврдејќи во неколку наврати дека не мамел пациенти и семејства, Митрев и вечерва обвини по дел од медиумите за инсценирани напади против него.
„Не знам зошто е толку потребно јавноста да биде претходно инволвирана, т.е. медиумите. Видовме еден дел од медиумите што сè можат да направат со инсценирани, превртени и буквално лаги кои се пласираа на таков начин како се пласираа и направија една грозоморна атмосфера во тоа време околу нас“,
искоментира докторот за утрешниот брифинг во обвинителството.
Во одбрана дека не правел измами, Митрев тврдеше и дека за третирањето пациенти имало согласности и семејствата биле свесни дека и покрај тоа што некој ќе биде третиран со хемофилтрација може да почине.
„Има документи, согласности, уснени согласности, телефонски разговори, за секој пациент докторите се должни да ги информираат. Ние први воведовме видеоконференција со фамилиите за да може да ги гледаат пациентите. Први дозволивме фамилиите да може да дојдат на интензивна нега, прописно облечени и да може да ги посетат и видат. Бевме максимално отворени за сето тоа што го работевме“,
рече Митрев.
Докторот настапи и со тврдење дека не им наплаќале на сите пациенти по 12 000 евра. Тоа, според него, не било наплата, туку давање депозит. Од оваа сума, тврдеше, половина биле за лежење на интензивна нега (600 евра од ден), а 6 000 за две хемофилтрации (по 3 000 евра за една).
„Имаше пациенти кои во најголем број од случаите немаше потреба да се вклучат на хемофилтрација. Сумата не се плаќаше, туку се депонираше. Ако по пет дена си оди пациентот без хемофилтрација и без продолжување на лекувањето на интензивна нега, сите други пари се враќаа назад. Ние имавме голема финансиска контрола, на ниеден пациент не му е наплатено нешто плус“,
рече Митрев.
Иако ИРЛ објави дека податоците од третирањето на пациенти се објавувани како клинички студии, Митрев вечерва уверуваше дека тоа всушност не биле клинички студии и дека нивна должност како лекари било да ги следат клиничките резултати и да ги објавуваат за општото добро, а „клинички студии“ ги нарекле зошто немало како поинаку.
„Како да кажеме? Студија? Па тие податоци ние ги анализираме, студираме. Кој термин да го употребиме? И со МАЛМЕД дојдовме во дискусија. Како да го крстиме?“,
рече Митрев кој тврдеше и дека МАЛМЕД не му поднела прекршочна за непријавени клинички студии.
Документарниот филм на ИРЛ кој привлече големо внимание во јавноста беше објавен на средината на јули 2022, а веќе на 18-ти истиот месец Јавното обвинителство отвори предистрага. На почетокот на август, пак, предистрагата напредуваше во истрага. Како мерка на претпазливост, Обвинителството побара, а судот одобри да се одземе патната исправа на Жан Митрев поради опасност од бегство. Докторот достави и гаранција од еден милион евра дека нема да избега во рамки на истрагата што се води против него за кривичното дело измама. Дали сега ќе се соочи со обвинение или, пак, можеби истрагата ќе биде запрена, се очекува да биде познато по утрешниот брифинг во ОЈО Скопје.