Опозициската ВМРО-ДПМНЕ, преку соопштение го прозва претседателот Стево Пендаровски прашувајќи што уште треба да направи професорот Денко Малески за тој да се огради од него.
Ваквата реакција доаѓа откако од претседателскиот кабинет посочија дека Пендаровски ќе продолжи да соработува со професорот по неговиот телевизиски настап во кој зборуваше за македонско-бугарските отворени прашања.
„Во јуни 2019 година Стево Пендаровски изјави Гоце Делчев се декларирал за Бугарин. Во април 2020 година советникот на Стево Пендаровски, Денко Малевски, за Гоце Делчев вели ’тој се определил како Б’лгарин‘. Стево Пендаровски за Денко Малески денес вели ’ова не значи дека претседателот Пендаровски не треба да соработува со професорот Малески‘. Значи Пендаровски мисли исто како и Малески. Прашуваме што точно треба уште Денко Малески да каже за да се откаже и огради Стево Пендаровски и владата на Заев и Спасовски“,
пишува во соопштението на ВМРО-ДПМНЕ.
Од опозицијата настапот на Малески на бугарската телевизија „Европа“, за којшто пишувавме, го нарекуваат антидржавен и го осудуваат молкот од политичките субјекти.