Пресудата е првостепена и странките имаат право на жалба до Апелација
По изрекувањето на пресудата, Обвинителството побара, а Судот им го продолжи притворот на обвинетите до правосилност на пресудата
Основниот кривичен суд во Скопје ги прогласи тројцата обвинети за виновни за убиството на хрватскиот ракометар Денис Тот кое се случи на 7 април годинава пред ноќен клуб во Градскиот парк во Скопје.
Со првостепената пресуда обвинетите добија затворски казни од:
- Анџело Ѓоргиевски (28) – 18 години затвор
- Клементина Левковска (19) – 18 години затвор
- Андреј Костовски (19) – 16 години затвор
Пресудата ја изрече судечки совет на чело со судијката Елена Илиевска-Јосифовиќ и таа не е правосилна бидејќи странките имаат право на жалба до повисокиот Апелациски суд Скопје.
Анџело и Клементина, рече судијката, имале поголем придонес во извршувањето на дело. За Анџело наведе дека и прв ги задал удрите кон Тот, а Клементина, која најмногу го удира, судијката ја опиша како „крајно упорна во ударите“.
Покрај затворската казна, Судот определи и надомест на штета за семејството на убиениот ракометар, и тоа по 9 милиони денари (околу 145 000 евра) за мајката и таткото и 8 милиони денари (околу 130 000 евра) за братот на Денис Тот. Солидарната надомест треба да се исплати во рок од шест месеци откако пресудата ќе стане правосилна.
При читањето на пресудата судијката наведе дека одбраната оспорувала дека во овој случај станува збор за убиство со умисла, меѓутоа, како што рече, обвинетите биле свесни за последиците, за што како пример и отежнувачка околност наведе дека Анџело и Андреј сокриле и од Брзата помош дека му задале удари на Тот.
Како најверодостојни докази ги спомена снимките од безбедносните камери од ноќниот клуб и од системот „Сејф сити“ на кои посочи дека јасно се гледаат дејствијата на обвинетите. Судијката потсети и на сведочењата што можеа да се слушнат во текот на судскиот процес, а за дел од нив – за другарите на обвинетите – наведе дека Судот не им придава целосна верба бидејќи тие се блиски, се знаат од детство и може да бидат пристрасни за да им ја олеснат положбата.
По изрекувањето на пресудата, Обвинителството побара, а Судот им го продолжи притворот на обвинетите до правосилност на пресудата
Судскиот процес траеше помалку од три месеци. Започна на 5 септември со воведни зборови на обвинителството и на одбраната.
Обвинителката од ОЈО Скопје, Тања Трајчевска, тогаш го опиша кобниот настан, при што посочи дека расправијата на тројцата обвинети со ракометарот започнала во такси-возило, а потоа продолжила и надвор од него. Преминала во физичка пресметка во која Тот се здобил со повеќе удари, прво тупаници од кои паднал на асфалтот. Додека лежел, пак, според Обвинителството, добил повеќе удари и со нога и со рака по главата и телото. Од тешките повреди Тот паднал во коматозна состојба, кај него било констатирано и нагмечување на мозокот, дошло до прекин на активноста на мозочните неврони, а сето тоа наредниот ден (8 април) резултирало со смрт.
Тројцата обвинети уште на стартот на судскиот процес, пак, рекоа дека никој од нив не сакал да се случи тоа. Нивните адвокати во воведните зборови настапија со теза дека овој кривично-правен настан не може да се квалификува како убиство бидејќи не постоела умисла.
Во судница се сослушаа повеќе сведоци, а меѓу првите се појави и таткото на Денис, Игор Тот, кој порача дека очекуваат да се дознае вистината, да се види дали обвинетите се виновни и, ако се виновни, да има соодветна казна.
Како сведоци беа повикани и вештаци од Судска медицина кои посочија дека најсериозните повреди со кои се здобил ракометарот биле нагмечување на големиот мозок и повреда на ’рбетниот мозок од кои втората ја посочија како фатална. Доколку не била повредата на ’рбетниот мозок, односно имало само нагмечување на големиот мозок, според нив, Хрватот би има поголеми шанси да преживее. На предлог на Обвинителството, сведочеше и психијатарот Александар Марцикиќ кој рече дека секој од обвинетите во време на настанот бил со запазено психичко здравје, така што, како што посочи, можеле да ги разберат своите постапки, да ги претпостават последиците и да раководат со нив.
Сведочеа и другари на обвинетите и на Тот, кои кобната вечер биле со нив во ноќниот клуб, раскажуваа дека ракометарот бил под дејство на алкохол, а еден од нив, кој влегол во таксито со обвинетите, зборуваше и дека Хрватот ја навредувал Клементина.
По сослушувањето на сведоците, презентирањето на материјалните докази, пред десетина дена странките ги дадоа и завршните зборови во кои обвинителката Трајчевска побара тројцата обвинети да бидат прогласени за виновни, а одбраната побара ослободителна пресуда со тврдење дека никој од обвинетите не ги задал фаталните удари на ракометарот и дека Обвинителството не докажало дека се исполнети „битијата“ на кривичното дело убиство.