Од ЦУК велат дека утрово во 2:30 ч. имало проблем во селото Џерма, каде што од силниот порој од водата од планинскиот уништен е ѕид на една куќа, а некои автомобили се блокирани
По вчерашното невреме, кое зафати повеќе делови од државата, се работи на отстранување на штетите од обилните врнежи на дожд што ги зафатија општините Виница, Долнени и Тетово.
Од Центарот за управување со кризи (ЦУК) велат дека во Виница досега се пријавени за поплавени над 60 објекти и таму речиси е завршено испумпување на водата од станбените објекти, а сега се работи на инфраструктурата во урбаното подрачје на градот и во текот на денот се очекува се да биде завршено доколку нема нови врнежи на дожд.
Екипи на ТППЕ Виница синоќа до 23:00 часот имале 20 интервенции, претежно на деловни објекти и училишта. Во најголем дел штетите се санирани, а во моментот се на терен со две пумпи и тројца пожарникари на пријава на еден деловен објект.
Втората критична точка вчера беше селото Лажани во Општина Долнени, кое беше поплавено, поради што некои жители беа евакуирани со трактори, а во општината од безбедносни причина беше исклучена струјата. Зафатени се над 30 објекти и сè уште се работи на расчистување. Ако нема пообилни врнежи од дожд, во текот на денот сè ќе биде под контрола.
Од ЦУК денеска велат дека се работи за долниот дел од селото, каде што поминува терцијалниот канал кој бил стеснет од ф-1000 на ф-100 и ф-200. Во овој дел има приватни станбени куќи.
Обилни врнежи на дожд по 20 часот синоќа имаше и во урбаниот дел на Тетово, а исто така и во Мала Речица. Евакуирани биле десетина луѓе, кои се сместени на безбедни места додека не се испумпа водата од нивните објекти.
Во Тетово има поплавени подруми, гаражи и куќи, а исто така излеана е канализацијата од неколку шахти.
Според последните информаци од ЈКП Тетово патот што води кон градот е прооден. Во расчистување на истиот се работелo во текот на цела ноќ и собраќајот во моментот се одвива непречено.
Од ЦУК велат дека утрово во 2:30 имало проблем во селото Џерма, каде што од силниот порој од водата од планинскиот уништен е ѕид на една куќа, а некои автомобили се блокирани. Жителите бараат надлежните органи што поскоро да преземат мерки. На терен се екипите на општините, ЦУК, ДЗС, ТТПЕ, СВР Тетово и други и, како што се наведува, се работи со градежна механизација.
Пријавени штети и во скопско
На бројот 112 вчера пријавени се и штети во скопско.
Се работи за откорнати олуци од покрив на куќа на „Кеј 13-ти Ноември“ во Маџир Маало, оштетена фасада на куќа на ул. „Мајаковски“ бр. 41 во Дебар Маало и откорнат лимен покрив од зграда на 11 ката и воедно кровот виси, со што ги доведува жителите во опасност.