Покрај „Плацови на Водно“, Трпков го предводеше судечкиот совет и во случаите за „Организаторите на 27 април“, „Ровер“, како и убиството на матурантот во Ѓорче Петров во 2014 година
Нов судечки совет ќе го води повторениот судски процес за „Таргет-Тврдина“ откако Апелацискиот суд во Скопје ја укина првостепената осудителна пресуда и го врати предметот на повторно одлучување пред Основниот кривичен суд.
На чело на новиот судечки совет од двајца судии и тројца поротници ќе биде судијата Илија Трпков кој од предметите познати за јавноста ги судеше „Организаторите на 27 април“ и „Плацови на Водно“.
Судијата Трпков и ексдиректорот на УБК, Сашо Мијалков, кој е еден од обвинетите за масовното прислушување во „Таргет-Тврдина“ веќе се познаваат од судница со оглед дека Мијалков седеше на обвинителна клупа и во „Плацовите на Водно“ каде што со првостепената пресуда доби 1 година и 3 месеци затвор.
Од други експонирани случаи во јавноста во изминатите години, Трпков ги водеше и предметот за убиството на матурантот Ангел во Ѓорче Петров во мај 2014 година, како и случајот „Ровер“, каде што меѓу обвинетите беше и Љубе Бошкоски.
На чело на првиот судечки совет во „Таргет-Тврдина“, пак, чија пресуда Апелација ја укина беше судијката Џанета Бегтовиќ како прв судија, а втор беше Владимир Туфегџиќ. Меѓутоа, Бегтовиќ повеќе не суди за организиран криминал туку е во друг оддел, а Туфегџиќ се повлече од судиската функција и сега работи како адвокат.
Тие ја донесоа пресудата во април 2021 година откако судскиот процес траеше повеќе од три години со оглед дека првото рочиште беше закажано во декември 2017 година.
Со првостепената пресуда Мијалков доби 12 години затвор, а покрај него на затворска казна од четири години беше осудена поранешната министерка за внатрешни работи Гордана Јанкулоска. Највисоки казни од по 15 години затвор добија двајцата избегани контраразузнавачи од т.н. Петта управа на тогашната УБК, Никола Бошковски и Горан Грујовски.
Во случајот беа обвинети вкупно 11 лица, кои со првостепената пресуда, која Апелација сега ја укина, беа осудени на вкупно 55 години затвор и 10 години условен затвор.
На ваквата пресуда обвинетите се жалеа до Апелацискиот суд Скопје, па на 7 март лани се одржа јавна седница. По јавната седница, дури девет месеци им беа потребни на апелациските судии да донесат одлука. На 5 декември лани решија да ја укинат пресудата бидејќи, според нив, била нејасна и неразбирлива, имало неусогласеност меѓу пресудата и она што е писмениот примерок односно нема опис на незаконските дејствија на секој од обвинетите итн.
По долгата постапка, Судскиот совет реши да го провери постапувањето на Апелација, па минатата недела објави извештај дека необјасниво долго се чекало девет месеци за да се донесе одлука со што се создадени услови за застарување на делата во оваа постапка.
За потсетување, застарувањето на делата на Мијалков во „Таргет-Тврдина“ би настапило во 2025 година, а имајќи ја предвид обемноста на предметот и должината на судските постапки неизвесно е дали до тогаш ќе има правосилна одлука.