„Вечерва претседателот Анджеј Дуда разговараше со шефот на ЦИА, Вилијам Брнс, кој е во Варшава по неговите посети на Анкара и Киев. Разговорот се однесуваше на општата безбедносна состојба во конктест на последните настани. Многу работа на линија Полска – САД денеска“, напиша на Твитер шефот на полското биро за национална безбедност, Јацек Шевјера
Шефот на полското биро за национална безбедност, Јацек Шевјера на Твитер објави фотографија од средба на претседателот на Полска, Анджеј Дуда со директорот на американската централна разузнавачка агенција (ЦИА), Вилијам Брнс, вечерва во Варшава.
„Вечерва претседателот Анджеј Дуда разговараше со шефот на ЦИА, Вилијам Брнс, кој е во Варшава по неговите посети на Анкара и Киев. Разговорот се однесуваше на општата безбедносна состојба во конктест на последните настани. Многу работа на линија Полска – САД денеска“,
напиша Шевјера на Твитер.
Wieczorem Prezydent @AndrzejDuda rozmawiał z szefem CIA Williamem Burnsem, który po wizytach w Ankarze i Kijowie jest w Warszawie. Rozmowa dotyczyła ogólnej sytuacji bezpieczeństwa, pojawił się kontekst ostatnich wydarzeń. Na linii PL-US wiele dziś pracy. pic.twitter.com/QuBCWRtksD
— Jacek Siewiera (@JacekSiewiera) November 16, 2022
Посетата на шефот на ЦИА на Варшава и неговата средба со полскиот претседател Анджеј Дуда доаѓа по инцидентот што се случи вчера вечер кога проектил експлодираше во полското село Пржеводов, во близина на границата со Украина, при што загинаа две лица.
Во Брисел денеска се одржа итен состанок на амбасадорите на НАТО со кој претседаваше генералниот секретар Јенс Столтенберг. Состанокот беше организиран на барање на Полска, која се повика на член 4 од договорот за НАТО, откако две лица загинаа во експлозија во Пржеводов, село во источна Полска во близина на границата со Украина.
„Истрагата за настанот е во тек, но немаме индиции дека станува збор за намерен напад или дека Русија подготвува воени акции против НАТО“,
рече Столтенберг.
Зборувајќи пред медиумите, полскиот претседател Анджеј Дуда денеска рече дека проектилот што паднал врз неговата земја „веројатно бил користен од украинската воздушна одбрана“.
Дуда рече дека Полска сè уште ја анализира можноста за активирање на постапката на член 4 на НАТО, но се чини дека можеби нема да биде неопходно да се користи мерката. Тој рече дека нема индикации дека ракетната експлозија во Полска во која загинаа две лица е „намерен напад“, опишувајќи ја како најверојатно несреќа.
Сепак, полскиот премиер, Матеуш Моравјецки денеска пред парламентот изјави дека Полска не може да ја исклучи можноста дека инцидентот е резултат на провокација од руска страна.
„Не можеме да исклучиме дека гранатирањето на украинската инфраструктура во близина на границата (меѓу Украина и Полска н.з.) е намерна провокација направена со надеж дека може да дојде до ваква ситуација“,
рече полскиот премиер во своето обраќање во парламентот на земјата.