СДСМ и ДУИ повторно располагат со 62 гласа во законодавниот дом, што, сепак, не им овозможува поголема комоција при носењето на одлуките, посебно во услови на епидемија, кога лесно би можело да се случи и други пратеници да бидат во изолација
Арбен Зибери, новиот пратеник на ДУИ, се врати денеска во парламентот, по речиси две недели отсуство поради ковид-19.
Спикерот Талат Џафери ги информираше пратениците дека Зибери, кој на претпоследната собраниска седница, на 30 август, гласаше од посебна кабина за изборот на новата Влада, како суспектен на ковид-19, имал два последователни негативни теста, така што, согласно со новите протоколи, нема решение за изолација и може да се врати на работа.
Така, Зибери денеска беше во можност да гласа за избор на претседатели, заменик-претседатели и членови на новите собраниски комисии. При распределбата на пратениците во работните тела, на Зибери, доскорешен директор на Центарот за јавно здравје – Скопје, му припадна претседателското место Комисијата за здравство.
Во периодот на предизборието, министерот за здравство Венко Филипче, го разреши Зибери од директорското место во Центарот за јавно здравје – Скопје, по неговата изјава дека издејствувал Комисијата за заразни болести да предложи отворање на границите, со цел иселениците да се вратат за изборите и да гласаат за премиер Албанец. Иако тоа предизвика конфронтации меѓу Зибери и Филипче, тие двајцата сега ќе бидат повторно упатени на понепосредна комуникација, со оглед на тоа што сите измени на закони во областа на здравството што ќе ги предложи Владата, преку Министерството за здравство, ќе треба да поминат низ собраниската Комисија за здравство, пред расправата за нив на пленарна седница.
Со враќањето на Зибери и денешната верификација на мандатот на пратеничката Емилија Рамбабова, која доаѓа на местото на новата министерка за труд и социјална политика Јагода Шахпаска (која беше претседателка на Комисијата за здравство во парламентот во претходниот мандат), се комплетира повторно новото собраниско мнозинство на „Можеме“ и на ДУИ, кое во изминатите две седмици беше сведено на 60 од вкупно 62 пратеници (само еден повеќе од неопходниот минимум).
Сепак, Џафери, на минатонеделниот брифинг со новинари, посочи дека треба да се најдат модалитети за работа на пратениците во услови на пандемија. Тој посочи дека земјава нема законска регулатива кој би предвидела алтернативни начини за функционирање на институциите во вонредни услови.
Според него, не смее да се дозволи парламентот, во случај на пандемија, земјотрес или пожар да не работи. Затоа рече дека ќе побара предлози од пратенички групи како да се реши овој проблем, односно дали да се оди со законски решенија или со промена на Деловникот за работа на Собранието.
Потребата од алтернативен начин за работа на Собранието се наметна со пандемијата на ковид-19,. Според СЗО, оваа состојба ќе потрае во следните две години. Јас како претседател на Собранието сум обврзан сум да размислувам за неговата функционалност и во редовна и во вонредна ситуација. Денска е пандемија, утре може да биде друга причина, а задутре трета. Може да биде пожар, земјотрес, кои ќе предизвикаат да има вонредна состојба. Во такви вонредни околности како ќе работи Собранието, каде ќе работи“,
изјави Џафери, дообјаснувајќи ја платформата која треба да им овозможи на пратениците да дискутираат и да гласаат и од дома или од канцеларија.