Со 98 гласа „за“, четири „воздржани“ и ниту еден „против“, пратениците ги изгласаа составите на собраниските комисии, предлог кој претходно беше усогласен од координаторите на сите пратенички групи.
И покрај тоа што дневниот ред за седницата беше усвоен, во расправата по оваа точка пратениците од опозицијата повторно посочија дека се крши процедурата и оти се гласа за персонален состав без Собранието претходно на парламентарна седница да донесе одлука за нивно основање и за дефинирање на надлежностите. Тие истакнаа дека Собранието требало да донесе ваква одлука бидејќи, според нив, некои од комисиите би можеле да претрпат измена на број на членови или опфат и делокруг на работа, како на пример, Комисијата за здравство која би можело да има поголем број членови со оглед на ситуацијата со пандемијата.
Кој ќе раководи со собраниските тела беше познато уште минатата недела.
ВМРО-ДПМНЕ, согласно собранискиот Деловник, кој предвидува опозицијата да претседава со надзорните комисии, по автоматизам ги доби комисиите за финансирање и за буџет и за надзор на Агенцијата за безбедност и на Агенцијата за разузнавање, како и за надзор на мерките за следење на комуникациите. Опозицијата има и претседател на Националниот совет за европски прашања, а ќе биде на чело и на Комисијата за надворешна политика, Комисијата за транспорт и врски, Комисијата за локална самоуправа, Комисијата за еднакви можности. Коалицискиот партнер на опозициската партија – Социјалистичката партија, ќе претседава со Комисијата за земјоделство.
СДСМ ќе ги предводи Комисијата за европски прашања, Законодавно-правната комисија, како и комисиите за одбрана, за политички систем и за образование.
ДУИ, пак, по автоматизам ја доби Комисијата за уставни прашања на чие чело ќе биде Талат Џафери како претседател на Собранието. Интегративците ќе ги водат и Комисијата за европски прашања, Комисијата за здравство.
Алтернатива ќе претседава со Комисијата за труд и социјална политика, Алијанса за Албанците со Анкетната комисија, Беса со Комисијата за култура.