Од Федерална управа за авијација наведуваат дека меѓународните летови ќе се третираат поединечно, од случај до случај
Американската Федерална управа за авијација (FAA) ги приземји сите летови што треба да полетаат, поради вонредни околности и безбедносни причини, пишува Ројтерс.
Националната забрана за полетување на сите авиони, е поради вонредни околности и безбедносни причини, откако претходно агенцијата пријави сериозни проблеми во комуникацијата на контролата на летање.
Оваа одлука значи дека авионите што се веќе во воздух можат да слетаат, но оние што се на земја не смеат да полетаат.
Кратко пред ова соопштение, Федерална управа за авијација го запре сообраќајот во Чикаго поради проблеми во комуникацијата на контролата на летање.
„Сите летови што треба да полетаат мора да останат приземјени до понатамошно известување“,
изјавиле од агенцијата.
Од Федерална управа за авијација наведуваат дека меѓународните летови ќе се третираат поединечно, од случај до случај.
Американскиот секретар за транспорт, Шон Дафи, во објава на платформата Икс наведе дека забраната за полетување е последица на проблем во комуникацијата и дека причината за прекинот е предмет на истрага.
The @FAAnews issued a nationwide ground stop for all U.S. airports following a communication issue impacting all Air Route Traffic Control Centers. FAA technicians are investigating the issue. We will provide immediate updates as we have them.
— Secretary Sean Duffy (@SecDuffy) November 13, 2026
Сервисот за следење „ФлајтАвер“ (FlightAware) соопшти дека речиси 7 000 летови биле одложени или откажани поради прекинот на полетувањата на национално ниво.
Ова претставува втора национална забрана за полетување на сите авиони уште од нападите на 11 септември 2001 година. Претходниот случај се случи во јануари 2023 година, кога Федерална управа за авијација ги запре сите домашни полетувања во траење од помалку од два часа.
Минатата година, Конгресот одобри 12,5 милијарди долари за надградба на застарениот комуникациски систем на Федерална управа за авијација, а денеска ФАА и Белата куќа побарале од Конгресот дополнителни 30,1 милијарди долари за решавање на други проблеми.