„Инцидентот беше предизвикан од проблем за време на претходната надградба на капацитетот на мрежата“, соопштија од компанијата
По неколкучасовни прекини што влијаеја на милиони корисници ширум светот, „Аутлук“ (Outlook) и другите услуги на „Мајкрософт“ (Microsoft) се враќаат во нормала.
„Мајкрософт“ се извини за прекинот, кој може да заврши со милијарди долари изгубена продуктивност, пишува Си-ен-ен.
Компанијата објави дека е постигнат напредок во закрепнувањето, велејќи дека бројот на пораки од електронската пошта што чекаат да бидат испратени е значително намален и се приближува кон нормалните нивоа.
Проблемите влијаеја на „Аутлук“, „Мајкрософт ексџејнџ онлајн“ (Microsoft Exchange Online) и други услуги поврзани со е-поштата. Корисниците не можеа да испраќаат или примаат пораки, да пристапуваат до алатката за вештачка интелигенција „Копилот“ на „Мајкрософт“ или да се приклучуваат на однапред закажани состаноци преку „Тимс“ (Teams).
Тешкотии се појавија и со услугите за споделување документи, управување со деловни податоци и безбедност на е-поштата.
Според проценка на тинк-тенк од Мичиген, прекинот оставил милиони без работните алатки што ги користат секој ден и може да чини 7 милијарди долари изгубена продуктивност.
Патрик Андерсон, претседател на „Андерсон Економик Груп“, изјави дека можеби дури 26 милиони корисници вчера и 51 милион корисници денес имале прекин на нивното работење на начин што предизвикал економска загуба. Тој додава дека трошоците веројатно ќе се зголемат над оваа првична проценка.
Властите во повеќе американски градови пријавија прекини, охрабрувајќи ги жителите да се јават во локалните канцеларии доколку е потребно. Некои Британци доживеале доцнења во добивањето на нивните рецепти за лекови, а неколку британски полициски сили им кажале на жителите да пријавуваат кривични дела или проблеми по телефон, а не преку нивните веб-страници.
Во меѓувреме, банкарските работници во Хонг Конг имаа прекин на работата, владините службеници во Јапонија прибегнаа кон креирање физички копии од документи, а судовите на Филипините беа попречени од прекинот. Некои железнички мрежи доживеаја прекини во услугите за е-пошта на клиентите и распоредите за рутите, додека австралиските училишта, судови и владини служби пријавија прекини.
„Мајкрософт“ изјави дека прекинот бил предизвикан од технички проблем, а не од какво било кршење на сајбер безбедноста.
„Инцидентот беше предизвикан од проблем за време на претходната надградба на капацитетот на мрежата што се појави по неодамнешната промена на мрежата“,
соопштија од компанијата.
Софтверскиот гигант соопшти дека, по спроведената анализа, ќе објави целосен извештај за инцидентот.
„Длабоко жалиме за прекинот што овој инцидент им го предизвика на нашите корисници и партнери. Свесни сме за довербата што тие ја имаат во нашите услуги и таа одговорност ја сфаќаме исклучително сериозно“,
напишаа од „Мајкрософт“ на платформата Икс.
We are deeply sorry for the disruption this incident has caused our customers and partners. We know the trust they place in our services and take that responsibility extremely seriously. We are seeing broad recovery and stability across our services. This was a technical issue not related to cyber or AI / agents. The incident was introduced by an issue during an earlier network capacity upgrade that surfaced following a recent network change. We have addressed the underlying issue and continue to restore service to remaining customers and regions. Given the scale of demand, we restored services gradually, validating stability at each stage. While this took longer, it helped ensure a stable restoration. We will provide a full post-incident report once our review is complete.
— Microsoft (@Microsoft) November 13, 2026