Министерот за здравство, Венко Филипче, му порача на директорот на Центарот за јавно здравје – Скопје и кандидат за пратеник од ДУИ, Арбен Зибер, дека нема да дозволи политичко поентирање на сметка на епидемијата.
Тврдењето на Зибери дека издејствувал Комисијата за заразни болести да предложи отворање на границите со цел да се вратат иселениците и да гласаат на избори за премиер Албанец, Филипче уште еднаш го оцени како неточно и штетно за угледот на Комисијата.
Коментирајќи го ставот на Зибери, пак, дека тој е кандидат за пратеник и има право на социјалните мрежи да објавува политички ставови, министерот вели дека тоа не му дава право „да изнесува невистини и да ја поткопува работата на Комисијата“.
„Tоа што сте во изборна кампања не ви дава за право да изнесувате невистини и да ја поткопувате работата и одлуките на Комисијата за заразни болести. Четири месеци градиме доверба и работиме транспарентно. Во ниеден момент не донесовме политички мотивирани одлуки и ова вие добро го знаете. Вашата изјава е неточна, штетна и пред сѐ неколегијална, што исклучително ме загрижува. Моја должност како министер меѓу другото е да го штитам угледот на колегите од комисијата и нивните стручни одлуки. Верувам дека разбирате каква штета нанесувате во овие чувствителни моменти кога заеднички се бориме за иста цел. Го ценам придонесот на сите кои се борат со епидемијата, вклучително и вашиот, но нема да дозволам политичко поентирање на сметка на епидемијата“,
напиша Филипче на Фејсбук.
Претходно во денот министерот Филипче на прес-конференција најави разрешување на Зибери од функцијата директор на Центарот за јавно здравје Скопје, по што директорот во изјава за „360 степени“ го обвини Филипче дека ја злоупотребува владината говорница за изборни препукувања.
„Министерот Филипче да престане да ја злоупотребува владината говорница за изборни препукувања. Јас сум кандидат за пратеник и имам право на мојот приватен фејсбук-профил да имам и политички ставови, притоа во ниту еден момент не злоупотребувајќи ја институцијата која ја водам, како што за жал прави министерот Филипче со ваквите изјави со изборна заднина“,
рече Зибери за „360 степени“.