На средбата Галовеј-Џафери, амбасадорката посочила на можноста британските пратеници да работат и да гласаат од далечина и понудила конкретна помош и поддршка во оваа област
Соочени со предизвиците од пандемијата со ковид-19, македонските парламентарци ќе треба консензуално да изградат деловничка основа за можност за работа на Собранието од далечина, особено за гласање од далечина, бидејќи неизвесноста со пандемијата во претстојниот есенски и зимски период е голема и ќе бара да се стават на располагање сите капацитети за справување со овие ризици. Пратениците, исто така, треба да донесат и времени правила за работа на Собранието во вонредна состојба.
За овие новини, кои првпат би се вовеле во работата на законодавниот дом поради ковид-кризата, спикерот Талат Џафери ја информирал денеска амбасадорката на Обединетото Кралство во Скопје, Рејчел Галовеј. Средбата беше по повод реизборот на Џафери на чело на парламентот, како и изборот на новата влада, со што, како што се наведува во соопштение од парламентот, се воспоставува целосна функционалност на највисоките државни институции во земјата.
Галовеј посочила на можноста британските пратеници да работат и да гласаат од далечина. Понудила конкретна помош и поддршка во оваа област, во насока на споделување и користење на искуствата.
Џафери ги потенцирал исклучителните билатерални односи меѓу Северна Македонија и Обединетото Кралство, за кои споделил очекување дека ќе продолжат со зголемена динамика и во наредниот период. Информираше дека во наредниот период претстои формирање на комисиите, делегациите и пратеничките групи за билатерална соработка, како и зголемена заедничка работа, како на пратениците од владејачкото мнозинство така и на пратениците од опозицијата, особено во пресрет на започнувањето на преговорите со Европската Унија.
Осврнувајќи се на Брегзит, Џафери истакнал дека Собранието стои на располагање брзо да се ратификуваат сите ревидирани трговски и економски договори меѓу нашата држава и Обединетото Кралство, за да може непречено да се одвива надворешно трговската размена. Во контекст на соработката со НАТО, Северна Македонија како најнова земја членка ќе соработува со британските колеги на рамноправна основа придонесувајќи во колективната стабилност и глобалната безбедност. Претседателот на Собранието ја оцени како мошне успешна досегашната соработка со фондацијата Вестминстер за демократија, при што нагласи дека сите започнати проекти продолжуваат.
Британската амбасадорка изразила позитивно очекување од натамошната реализација на проектите меѓу Собранието на Северна Македонија и фондацијата Вестминстер. Воедно, ја истакнала силната политичка поддршка на новите Собрание и Влада, нагласувајќи ја потребата од натамошно заедничко градење на добри и коректни односи на релација власт – опозиција.
Соговорниците, како што соопштија од кабинетот на Џафери, размениле мислења околу актуелните политички случувања во државата, активностите на Собранието и Владата во контекст на фокусирање кон предизвиците од пандемијата и приспособувањето на животот на граѓаните кон новата состојба, дијалогот власт – опозиција, како клучен императив на демократијата, можностите за унапредување на меѓупарламентарната соработка и споделување на заедничките искуства од надворешната политика и парламентарната дипломатија.