Од претседателот на парламентот Џафери денеска не може да се добие став, додека соговорниците од парламентот кои успеавме да ги консултираме, неофицијално за „360 степени“ најавуваат дека сите дилеми ќе треба да се расчистат на координацијата в понеделник
Една од варијантите е Законот, сепак, да биде ставен на дневен ред, но да не биде потврден со најмалку 61 пратенички глас, така што нема да може да стапи во сила. Потоа Владата би можела да поднесе нов предлог-закон за оваа проблематика
Повеќе дилеми меѓу пратениците отвора одлуката на Владата да го повлече контроверзниот закон за легализација на дивоградби, кој веќе е донесен и требаше да биде ставен во трето читање на собраниската седница што почнува на 8 јуни, за евентуално да биде потврден со најмалку 61 глас, по ветото од претседателот Стево Пендаровски.
За дел од правниците кои ги консултиравме, пак, нема пречки Владата да го повлече Законот, бидејќи токму тоа е и една од целите на ветото што го става шефот на државата.
Од претседателот на парламентот Талат Џафери денеска не може да се добие став, додека соговорниците од парламентот кои успеавме да ги консултираме, неофицијално за „360 степени“ најавуваат дека сите дилеми околу ова прашање ќе треба да се расчистат на координацијата в понеделник.
Во собранискиот Деловник, како што велат нашите соговорници, не е прецизирано дали предлагачот може да повлече Закон кој е веќе донесен и треба само да помине низ проверка во трето читање. Според Деловникот, предлагачот на законот може да го повлече предлогот пред почетокот на расправата, ама проблемот во овој случај е што Законот за легализација на дивоградби, всушност, е веќе донесен.
Соговорници од владејачкото мнозинство, исто така, посочуваат дека овој закон, всушност, е резултат на политички договор меѓу владејачките СДСМ и ДУИ и опозициската ВМРО-ДПМНЕ, така што, ако трите партии постигнат согласност за подготовка на нов закон, не би требало да има проблем. Во спротивно, постои можност некоја од партиите да поднесе повеќе амандмани на одредбите што ги посочува Пендаровски и со тоа да се блокира или барем да се одолговлечи постапката за донесување на овој Закон.
Во ваков случај, Владата како предлагач на Законот ќе треба да се изјасни дали ги прифаќа или не амандманите што би биле поднесени, но прашање е како ќе се изведе тоа ако предлагачот решил да повлече Закон што, практично, е веќе донесен. Од Собранието велат дека топката сега е кај Џафери и тој треба да одлучи како ќе се постави во овој случај и кои деловнички можности ќе ги искористи.
Една од варијантите е Законот, сепак, да биде ставен на дневен ред, но да не биде потврден со најмалку 61 пратенички глас, така што нема да може да стапи во сила. Потоа, Владата би можела да поднесе нов предлог-закон за оваа проблематика.
Законот беше изгласан во Собранието на 11 мај, со поддршка од пратеници и од власта и од опозицијата. „За“ гласаа 72 пратеници, тројца беа „воздржани“, а петмина „против“.
Меѓутоа, шефот на државата одлучи да не го потпише указот за прогласување на законот со образложение дека се нарушуваат темелните вредности и поттикнува на непочитување на законите, но и нуди амнестија на лица што веќе се гонат кривично за бесправно градење.
По ветото од претседателот и враќањето на законот во Собрание, Џафери во четвртокот рече дека негова деловнички обврска е да го стави законот на дневен ред законот во рок од 30 дена од неговото донесување. Оттука, најави дека ќе го стави на дневен ред на пленарната седница што треба да почне на 8 јуни.
Владата, пак, денеска одлучи да го повлече законот откако Министерството за транспорт и врски ја информирало дека изминатиот период организирано низа работни средби со претставници на коморите, асоцијации од областа на градежништвото и урбанизмот, граѓанскиот сектор… Тие дале свои забелешки и врз основа на сугестиите од владата утрово најавија дека ќе се направи нов предлог-закон.