Владата на денешната седница одлучила да го повлече од собраниска процедура Законот за утврдување правен статус на бесправно изградени објекти, кој предизвика низа реакции во јавноста и доби вето од претседателот Стево Пендаровски.
Меѓутоа, како што најавија, ќе изработат и ќе поднесат нов закон.
Одлуката за повлекување на актуелниот предлог Владата го донела откако Министерството за транспорт и врски ја информирало дека изминатиот период организирано низа работни средби со претставници на коморите, асоцијации од областа на градежништвото и урбанизмот, граѓанскиот сектор …, кои дале забелешки на законот, но и предлози и сугестии за негово доуредување.
„Министерството за транспорт и врски ќе изработи нов предлог-закон за утврдување на правен статус на бесправно изградени објекти, согласно дадените забелешки“,
велат од Владата.
Актуелниот предлог-закон, кој Владата денеска одлучи да го повлече од собраниска процедура, беше изгласан во Собранието на 11 мај, со поддршка од пратеници и од власта и од опозицијата. „За“ гласаа 72 пратеници, тројца беа „воздржани“, а петмина „против“.
Меѓутоа, шефот на државата одлучи да не го потпише указот за прогласување на законот со образложение дека се нарушуваат темелните вредности и поттикнува на непочитување на законите, но и нуди амнестија на лица што веќе се гонат кривично за бесправно градење.
Со ветото на Пендаровски, законското решение беше вратено во собраниска процедура, а пред пратениците повторно требаше да се најде на седница на 8 јуни.