Од Општина Центар побараа санкции за наставничката од ОУ„Гоце Делчев“ бидејќи, како што посочија, иако имала симптоми и не одела на работа, сепак, го носела своето дете на настава во истото училиште. Директорката на училиштето, пак, тврди дека ниту наставничката ниту детето не се појавиле во школо од 2 октомври
Наставничката и нејзиното дете, кои се болни од ковид-19, речиси една недела немаат дојдено во училиштето, тврди директорката на скопското училиште „Гоце Делчев“, Наде Молеровиќ.
Во изјава за „360 Степени“, таа го демантира соопштението на Општина Центар, во кое Општината информираше дека наставничката. иако имала симптоми на вирусот и не доаѓала на работа, сепак. го носела своето дете на настава во истото училиште.
Молеровиќ вели дека станува збор за недоразбирање и тврди дека од 2 октомври и наставничката и нејзиното дете се во самоизолација.
„Од петокот наставничката и нејзиното дете се во самоизолација. Реагирав до Општина Центар за тоа што го објавиле. Најодговорно, од мое име и од името на наставничката, изјавуваме дека од 2 октомври не доаѓаат ниту во школо ниту на работа. Вчера попладне добиле позитивен резултат на нивниот тест“,
вели Молеровиќ за „360 степени“.
Претходно, од Општина Центар побараа директорката да го истражи случајот и да ја санкционира наставничката, која, како што посочија, не одела на работа, но го носела детето на настава.
Коментирајќи ја реакцијата на директорката, од Општина Центар за „360 степени“ велат дека таа информација ја добиле токму од Молеровиќ и врз основа на тоа испратиле соопштение до јавноста со цел да нема шпекулации за случајот.
Во соопштението, градоначалникот Саша Богдановиќ вели дека несовесно и неодговорно однесување на еден просветен работник не смее да биде толерирано и порача дека очекува санкции за наставничката.
Ова е втор потврден случај на заболена наставничка во истото училиште, а бидејќи и нејзиното дете е позитивно на ковид-19, целиот клас од 22 првачиња е испратен во самоизолација.
Првиот случај беше потврден вчера, кога во превентивна изолација беа испратени уште 17 првачиња. За трета наставничка, пак, која има сомнителни симптоми на вирусот, в сабота се чекаат резултатите од тестирањето.
На ниво на земјава, пак, според информациите од Министерството за образование, вкупно 8 наставници и 53 ученици се во изолација.