Уште една наставничка е во изолација како сомнителна и ги чека резултатите од тестирањето кои треба да бидат готови до сабота
Таа дотогаш ќе остане дома, додека децата од нејзиното одделение одат на настава со заменски наставник
Седумнаесет првачиња од ОУ „Гоце Делчев“ во скопската населба Центар од синоќа се во 14-дневна изолација откако една наставничка е позитивна на коронавирус.
„За една наставничка е потврдено дека е позитивна на ковид-19. Вчера добивме резултати и веднаш им се јавивме на родителите. Таа ќе држи онлајн-настава, а децата се во изолација“,
изјави за „360 степени“ директорката на училиштето, Наде Молеровиќ.
Таа рече дека уште една наставничка е во изолација како сомнителна и ги чека резултатите од тестирањето в сабота. Таа дотогаш ќе остане дома, додека децата од нејзиното одделение одат на настава со заменски наставник.
„Сѐ додека не се потврди дека таа има ковид-19, децата ќе одат во училиште. Наставничката можеби има само настинка. В сабота, ако се покаже дека се работи за ковид, в понеделник ќе ги изолираме децата“,
ни изјави Молеровиќ.
Министерката за образование и наука, Мила Царовски во врска со овој случај денеска изјави дека тоа е прв каде деца се во изолација, но дека наставата продолжува онлајн, бидејќи наставничката која е заразена се чувствува добро.
Досега има вкупно пет наставници со ковид на ниво на цела држава, но сите тие биле со онлајн настава и немале контакт со учениците.
Одговарајќи на новинарско прашање, дали овој случај со деца во изолација не ја доведува во прашање мерката за носење маски за време на наставата во училиштата, бидејќи децата секако одат во изолација при контакт со заразен, Царовска рече дека тоа е препорака од Комисијата за заразни болести, која нема намера ниту да ја дискутира ниту да ја доведува во прашање, туку ќе се почитува.