Лидерот на ВМРО-ДПМНЕ тврди дека, според последните анкети, разликата помеѓу неговата партија и СДСМ е зголемена за 30 000 во споредба со локалните избори во октомври 2021 г.
Лидерот на опозицијата, Христијан Мицкоски, во вечерашното гостување во емисијата 360° на Алсат ТВ рече дека смета оти новата влада предводена од Димитар Ковачевски нема да направи ништо подобро од последната влада што ја предводеше Зоран Заев.
Мицкоски смета дека „го немаме тој комфорот да ѝ се даде време на Владата“, па затоа повтори дека се потребни предвремени избори.
„Ние можеме да седиме на страна, да си работиме тоа што си работиме, да го критикуваме тоа што не чини, да имаме комотна позиција и да видиме како ќе се одвиваат работите. Јас сум силно убеден дека овој капацитет на луѓе не може да направи ништо подобро од, според мене, најслабата влада во изминатите 30 години, а тоа е претходната влада“,
рече Мицкоски.
Тој беше прашан и за последните анкети за кои брифираа од партијата и според кои опозицијата е во водство: една на ИПСОС правена во декември 2021 г, според која ВМРО-ДПМНЕ е во предност од околу 9 отсто пред СДСМ, и втора од јануари 2022 г., според која, разликата е 4,6 отсто во полза на опозициската партија.
На прашањето – дали од ова треба да се заклучи дека само со изборот на новата влада СДСМ успеал двојно да ја намали предноста, Мицкоски вели дека не може да се прават споредби на двете анкети затоа што едната е правена телефонски, а другата теренски.
На коментарот дека 4,6 % не е драматична голема разлика, лидерот на ВМРО-ДПМНЕ вели дека тоа е сериозна предност со оглед дека станува збор за опозициска партија.
„И поискусните и од мене и од вас знаат дека за опозиција 4,6 процентни поени е сериозна предност во услови кога имаме ваква поделеност во општеството. Кога тоа би го пренеле во разлика во број на гласови, тоа би било повеќе од 85 000 гласа што е навистина сериозна бројка. Или да се држиме до бројките од локалните избори, ако тогаш разликата беше 55 000 на советничките листи, сега е за дополнителни 30 000 гласа зголемена“,
вели Мицкоски.
*Повеќе вести од интервјуто на Мицкоски за 360°:
Мицкоски одговара зошто бара избори иако штотуку добивме нова влада
Мицкоски: ВМРО-ДПМНЕ ќе добие уште двајца потпретседатели
Мицкоски: Задоволен сум од досегашната работа на градоначалничката Арсовска
Мицкоски со предлог: Да го намалиме бројот на пратеници на 90 и да зборуваме за една изборна единица
Мицкоски: Подготвени сме да разговараме за праг под три отсто при една изборна единица
Мицкоски за случајот со ЕВН Електрани: Да го истражат случајот и секој што се огрешил да одговара