„Додека Филипче се занимава со црни сценарија, да не се грижи, банката ќе биде спасена и банката ќе продолжи да функционира. Пропаднаа само црните сценарија на СДС и Филипче“, се вели во реакцијата на владејчката партија на денешната прес-конференција на лидерот на Социјалдемократскиот сојуз
Наместо да поздрави решение кое треба да придонесе за стабилноста на финансискиот систем и сигурноста на граѓаните, тој повторно се обидува да шири политички конструкции, да создава недоверба и креира црни сценарија, се вели во реакцијата од ВМРО-ДПМНЕ на денешната прес-конференција на лидерот на опозицискиот Социјалдемократски сојуз на Македонија, Венко Филипче.
Од владејачката партија оценуваат дека Филипче е нервозен околу случајот со Алта банка затоа што Владата покажува дека проблемите можат да се решаваат, наместо да се оставаат на граѓаните да ги плаќаат последиците, како што, според нив, било во времето на СДСМ.
„Очигледно е дека проблемот на Филипче не е во решението за Алта банка, туку во тоа што оваа Влада покажува дека проблемите можат да се решаваат… СДС треба да се потсети дека во нивно време се затвораа банки, финансиски институции пропаѓаа, а граѓаните и компаниите се соочуваа со неизвесност додека кланот Заеви се богатеа“,
се вели во реакцијата од партијата на власт.
Оттаму повторно потсетуваат на случајот со Еуростандард банка и, како што наведуваат, сомнежите и прашањата за кредитирањето на фирми блиски до СДСМ и поранешниот лидер на партијата, Зоран Заев. Во врска со овој случај, тие потсетуваат и на повлекувањето на средствата од страна на тогашната министерка за финансии Нина Ангеловска, непосредно пред затворањето на банката.
„Тогаш Нина Ангеловска, неколку дена пред да пропадне банката, си повлече од неа 250 илјади евра“,
се наведува во соопштението од ВМРО-ДПМНЕ.
Според владејачката партија, Филипче и партијата што ја предводи немаат кредибилитет да држат лекции за финансиска стабилност додека избегнуваат одговори за периодот во кој тие управува со државата.
Во таа насока, од ВМРО-ДПМНЕ порачуваат социјалдемократите наместо да ја напаѓаат секоја иницијатива за решавање на проблемите, да одговорат на прашањата кој добивал кредити, под кои услови, колку од тие средства биле вратени и дали постоеле привилегирани клиенти блиски до тогашната власт предводена од нив и ДУИ.
„Филипче не треба да биде нервозен кога се решаваат проблеми. Треба да биде подготвен да одговори за времето кога неговата партија беше на власт. Додека Филипче се занимава со црни сценарија, да не се грижи, банката ќе биде спасена и банката ќе продолжи да функционира. Пропаднаа само црните сценарија на СДС и Филипче“,
велат од ВМРО-ДПМНЕ.
На крајот од реакцијата тие упатуваат порака до граѓаните велејќи дека треба да бидат спокојни, бидејќи сè додека Христијан Мицкоски и ВМРО-ДПМНЕ се на власт, ќе има плати и пензии, а банки нема да пропаѓаат.
Инаку, на денешната прес-конференција претседателот на СДСМ го праша премиерот Мицкоски во кое својство кажува дека нашол купци за Алта банка и дали токму тој е човекот кој претходно ја донел банката во Македонија. Според Филипче, одговорот на второто прашање е познат, бидејќи гувернерот на Народната банка, Трајко Славески, јавно признал дека премиерот знаел сè за влезот на банката.
Лидерот на СДСМ го отвори прашањето и зошто на владина седница се носеле одлуки со кои јавни претпријатија ги отстапувале своите акции во корист на Алта банка, а не на некоја друга банка.
Во врска со продажбата на банката, тој посочи дека според законите и прописите, потребно е да има најмалку две банки за да се организира аукција и праша дали тие се најдени.