Околу 70 % од кредитокорисниците – физички лица одлучиле да ги прифатат понудите за одложување на наплатата на кредитите, како олеснување на финансискиот товар предизвикан од пандемијата со коронавирусот, соопшти Македонската банкарска асоцијација, повикувајќи се првичните податоци добиени од банките и штедилниците, членки на оваа асоцијација.
Во однос на правните лица, пак, од Асоциацијата истакнуваат дека понудите се усогласуваат со секој клиент одделно, во зависност од неговите потреби.
Во соопштението, МБА потенцира дека банките и штедилниците исто така нудат можност физичките лица коишто ја прифатиле понудата, а во следните месеци ќе сакаат и ќе бидат во можност да продолжат со плаќање на кредитите, да се изземат од понудата.
Исто така, постои и можноста, оние кои сега одбијат вакво одложување, дополнително да ја прифатат доколку во натамошниот период проценат дека имаат потреба од привремено олеснување на финансискиот товар, до завршување на грејс-периодот предвиден со понудата.
Од МБА потсетуваат дека барањата за изземање или приклучување кон понудата, во претстојниот период ќе се процесираат индивидуално.
„Секој клиент што ќе има вакво барање ќе треба телефонски или со е-порака да ја контактира банката или штедилницата од којашто користи кредитен производ, за да се договори како да го достави барањето и притоа да биде заштитено неговото здравје“,
соопштија од МБА.
Владата на седницата од 25 март донесе Уредба со законска сила да им се помогне на граѓаните и фирмите во исплатата на кредитите во банките, поради кризата со коронавирусот.
„Она што се уредува во оваа уредба е начинот на одлагање на ратите на долговите на граѓаните и на фирмите, односно истото ќе може да се направи без да се оди на шалтер во банка, без да се потпишува анекс итн. Уредбата моментално вели дека секоја банка ќе објави на својата интернет-страница или ќе го извести секој клиент за поповолната понуда. Ако физичкото лице во рок од 10 дена не се произнесе, односно не каже дека ја одбива понудата, ќе се смета дека поповолната понуда (замрзнување на ратите за три месеци) е прифатена“,
појасни тогаш министерката за финансии Нина Ангеловска.
Банките – членки на Македонската банкарска асоцијација неколку дена подоцна соопштија дека нивната понуда е одлагање на отплатата на кредитите до шест месеци, односно најдоцна до 30 септември.
*Поврзана вест