Одлагање на отплатата на кредитите до шест месеци, односно најдоцна до 30 септември, е одлуката на банките членки на Македонската банкарска асоцијација што ќе им ја понудат на граѓаните.
Од банкарската асоцијација, сепак, потенцираат дека мерките што вклучуваат одложување на отплатите на кредитите се наменети за оние физички лица и компании кои навистина се во неможност во овој период да продолжат со подмирување на своите обврски кон банките и штедилниците и други доверители заради престанок со работа на компаниите, губење работни места, намалување плати итн.
„Се разбира, сите оние што се во можност да продолжат да отплаќаат, да го сторат тоа. На тој начин ќе покажат солидарност со сите оние на кои навистина им е потребна помош во текот на кризата со коронавирусот“,
нагласуваат од МБА.
Дел од банките, како што наведуваат од МБА, веќе започнаа со објава за промена во условите за плаќање на кредитите што произлезе од околностите настанати од коронавирусот.