Министерството за финансии има три сценарија за последиците од коронавирусот. Образложувајќи ги на прес-конференција, министерката Нина Ангеловска изјави дека поради владините мерки за превенција на ширењето на коронавирусот, приходите во државната каса бележат остар пад и според најлошото сценарио се смета дека буџетскиот дефицит годинава би достигнал 1,3 милијарда евра.
Ангеловска најави значајна пренамена на буџетските средства, со која, како што вели, парите пред сè ќе се насочат кон здравствениот систем и владините економски мерки за помош на граѓаните и фирмите.
„Првото сценарио е најдоброто и се претпоставува ако имаме пад од 20 отсто на вкупните буџетски приходи во однос на планот, тоа значи и намалување на приходите за 700 милиони евра и за толку би се зголемил дефицитот кој беше проектиран на 300 милиони евра. Ако има пад на приходите за 30 отсто, потребите би се зголемиле за 1 милијарда евра, а најнеповолно сценарио е ако приходите паднат за 40 отсто, тогаш буџетскиот дефицит би бил 1, 3 милијарда евра“,
порача Ангеловска.
За сите сценарија Ангеловска вели дека се прават и планови за финансирање, но потенцира дека дополнителен проблем е и непредвидливоста на пазарите на капитал. Сепак, првите позајмици од меѓународните кредитори очекува да стигнат во мај.
На прашањето зошто иако е најавено одложување на кредитите за граѓаните и фирмите банките сепак ќе пресметуваат камати, министерката порача дека тоа е неопходно за одржување на стабилноста на банкарскиот систем.
„Дури и во земјите каде што се воведе т.н. мораториум на кредитите, каматите комплетно не се бришат или одложуваат или простуваат. Како пример Словенија, Црна Гора, Албанија и Србија имаат мораториум, но каматите се пресметуваат и се репрограмираат во следниот период. Заштитата на банкарскиот сектор не значи дека Владата не бара од банките да се солидализираат, туку значи дека цели да ги заштити граѓаните и на долг рок, бидејќи стабилноста на банките е важна за заштита на граѓаните и нивните средства и во иднина, за банкарскиот сектор да продолжи нормално да функционира и во кризата и по неа“,
порача Ангеловска.
Во однос на предлогот за одлагање и на плаќањето на закупнините, Ангеловска изјави дека Владата ја разгледува и оваа опција како мерка, а додека не излезат со детали ги повика сите што се во можност да ја одложат наплатата на кириите.